蔡一智留頭場飛索簽名

昨日到場欣賞黎明4D騷依然巨星如雲，包括蔡一智（阿智）夫婦，盧巧音夫婦、吳君如、陳可辛、露背上陣的前港姐張舒雅與周慧敏等。戴黑超的阿智獲粉絲讚帥，他表示是首場觀眾，因取消才睇「補場」，覺得昨晚的門票別具意義：「我一定要入去畀Leon喺上面簽番個名！」還自爆一直愛看黎明的演唱會：「一定要嚟觀摩吓呢個4D呀！（有興趣喺呢度搞？）有！日日喺度開工一定好開心！（唔怕好多問題？）唔怕！Leon都做咗先鋒，喺佢身上Learn（學）到好多嘢！」盧巧音同樣原本睇首場，與老公Sammy首次到海濱長廊，自嘲大鄉里！