逾5萬人爭睇舉頭三尺有黎明
黎明昨晚補辦因帳篷問題而取消的首場個唱，特設破天荒大玩Facebook現場直播，直播僅短短4分鐘，實時看直播人數逾5萬人！他事前在網上解釋決定開心Share，希望彌補已離開香港而無法留港睇騷的海外粉絲，舉動十分窩心！
天王黎明（Leon）在中環海濱長廊舉行的《黎明LEON 30TH ANNIVERSARY RANDOM LOVE SONGS 4D IN LIVE 2016》，頭場以來一波三折，其中最震驚是原本在上月28日舉行的首場演出，因所採用的帳篷物料未符消防安全規定而不獲食環署發牌演出，被迫開騷前兩小時臨時取消。事後，Leon即刻諗計，翌日決定拆卸巨型帳篷，排除萬難下成功開騷，並安排昨晚補辦首場演出。
半小時逾38萬瀏覽次數
今次個唱，Leon寫下多個創舉，包括製作費高達七千萬元及全港首個4D騷，昨晚再添另一創舉，決定創先河在個唱壓軸玩Facebook直播！Leon騷上繼續唱盡冧歌及大講金句：「好多時候，有啲嘢想問嘅時候唔問，可能唔問嘅答案好過問嘅，頭先諗到啲嘢好耐，但都係唔講啦！可能答案唔講好過講。」
終於到10時直播時間，身穿西裝的他手執電話，對着四面觀眾玩自拍，又發動觀眾以兩文三語，跟睇直播的朋友打招呼：「海外嘅朋友大家好，香港隨時歡迎你哋返嚟，Hong Kong welcome you！」行勻四面台後，他發動全場一起再講一次：「講完國語，不如講埋泰文？都係唔好啦！不如唱歌啦！雖然大家有唔同時差，但都要開開心心，嚟唔到呢個騷嘅朋友唔緊要，我哋成班朋友同你一齊。」隨即唱出《夜夜夢中見》。雖然直播只有短短四分鐘，但一開波即吸引多人觀看，觀眾秒速飆升，最高峰更吸引逾5萬人一起實時收睇直播，認真誇張！截至10時35分，逾38萬瀏覽次數，又吸引多逾2萬人留言，其中有粉絲影住家中愛犬一齊睇直播，亦有人留言：「舉頭三尺有黎明。」
今次創先河玩直播，Leon昨午拍片宣布此消息時坦言希望彌補已離開香港的粉絲：「今日係補番28號睇唔到演唱會嘅朋友，有啲朋友返咗外國，包括澳洲、台灣同內地等……有啲朋友退票睇唔到個騷，所以今晚我哋希望同大家go live，希望海外嘅朋友同我哋分享另一種感覺！」可謂相當貼心！不過，Leon亦表示因昨日補場申請不及抽獎牌，故未有舉行摩天輪環節，待明、後日才會有抽獎。由於Amusic昨午約1時才在網上公布消息，有一早已到場排隊的粉絲得知環節取消，坦言有點失望。
否認受壓提早開場
昨晚的演唱會於晚上8時23分開騷，比前晚提早3分鐘，為最早開騷的一晚。問到Amusic高層王凱文是否受到環保署壓力而愈來愈早開騷？他否認說：「太敏感喇！演唱會係依照環保署定下嘅標準嚟開騷，即係8點半前要開騷、11點前要清場，見觀眾早咗入場，所以就早啲開始。」直播結束後，唱到最後一首歌《夏日傾情》前，Leon說：「多謝上天每一日對我嘅恩賜，尤其是天氣，依家我已經好滿足！不久將來我哋會再見，但喺邊度見到自有安排，聽日返工嘅就正常返工，唔使返工嘅就做正常嘅嘢，Good night and good luck！」並向四面台揮手再見，最後10時15分完騷，反而比前晚遲2分鐘結束。
文：音樂組