馬詩慧嗒「新抱」糖想囝囝學乖

型男王敏德（Michael）、名模馬詩慧（Janet）、女兒王曼喜及兒子王躍穎前晚一同出席瑞士華裔鋼琴家王思韻鋼琴演奏會，名模姚書軼、歐陽妙芝等亦有現身。提到Michael早前生日，並舉家在家慶祝，他自爆當天發生的趣事：「我哋打邊爐，個爐底熱溶咗枱面嘅膠，成個黑晒，差啲燒着。」

讚不絕口

提到囝囝當天偕女友出席，Michael即表示自己非常意外，不知囝囝會帶女友現身，在旁的Janet即說：「係我請佢嚟嘅。」Janet坦言見過對方很多次，更對她讚不絕口：「佢係乖女仔，依家仲未到談婚論嫁嘅階段，當朋友仔。個女仔讀書乖，希望可以影響到我個仔讀書。（有冇八卦仔仔點樣識女友？）依家網絡世界發展咁快，用facebook就可以識到所有學校嘅人。」

靠樣冧妻

另外，Michael自爆剛開始學彈琴，並以英語說出一系列專業用語，當他發現記者聽得一頭霧水，即要求Janet翻譯，但Janet竟表示不知道他說甚麼，Michael笑說：「我哋結婚23年都聽唔明，所以可以咁長久。」Janet亦附和說：「要好多時間了解，永遠都咁新鮮！」Michael又表示非常欣賞鋼琴家郎朗及李雲迪，更曾問李雲迪取簽名。問到Janet是否被Michael的琴技迷倒？她笑說：「唔係用呢樣嘢。（咁靠咩？）樣囉。」

文：名人組