憶蓮冧倫永亮獲封國寶
林憶蓮一連四場《2016林憶蓮PRANAVA/造樂者世界巡迴演唱會》，前晚在紅館舉行尾場，甘願在台上當憶蓮「背後男人」的恭碩良和倫永亮（Anthony），公開獲憶蓮示愛，而Anthony激讚憶蓮完美女人可封「國寶」。
前晚有不少圈中人支持林憶蓮，包括莫文蔚、鍾楚紅、周麗淇及契爺胡楓等，而台上憶蓮稱坐第一排的都是其中學同學，自爆同學都叫她「阿蓮」。憶蓮開騷不久指自己已攞定紙巾抹眼淚，結果她多次感動落淚成喊包。
「瓜柴」前好回憶
憶蓮在台上有男友恭碩良為她打鼓，但歌迷對個唱音樂總監倫永亮反應更熱烈，憶蓮更公然向Anthony說「我愛你」，Anthony即指向恭碩良，憶蓮笑言：「呢種愛同嗰種愛唔同，唔能夠混淆。」
當晚憶蓮繼續獻唱多首經典歌，其勁歌熱舞令歌迷high爆，到Encore環節，Anthony稱早已為憶蓮準備多首歌，憶蓮笑言：「唱到12點都冇所謂，係製作單位畀錢嘅。」
Anthony又大讚憶蓮：「開頭我覺得冇嘢係完美，但你呢個女人物體，唔知可唔可以用國寶去形容，無論年紀同歌藝都係完美。」兩人唱畢《明天醒來時》Anthony搞笑說是他「瓜柴」前的美好回憶，之後憶蓮再多唱四首歌，以《至少還有你》作結。
唔知歌迷疑被騙
完騷後憶蓮受訪，問到對Anthony和恭碩良的「愛」？憶蓮冧爆說：「梗係唔同，一種友情、一種愛情，好明顯。（首次公開講愛情？）唔係，我成日都講！（台上冇多謝男友？）個個樂手都有多謝，唔使特別多謝佢，咁好偏心。」另外，問到有歌迷在網上其演唱會飛疑遭騙財？憶蓮的工作人員即搶答指憶蓮不清楚事件不作回應。
文：音樂組