學友王家衛結怨唔會再合作
歌神張學友昨日舉行座談會，回顧從影卅一年來的往事，大談與導演王家衛的「恩怨」，暗示雙方不會再合作之外，又自爆當年新人拍戲時過分投入角色，因而愛上對手羅美薇，結果「影響一生」！
張學友與導演舒琪昨日出席「電影的張學友與張學友的電影」座談會，大談多年來拍戲的點滴，談及與導演王家衛合作感受，舒琪指學友在《旺角卡門》及《阿飛正傳》兩片角色，有如荷里活大導馬田史高西斯於《Mean Streets》內由羅拔迪尼路演的角色原形，學友笑指事前沒有參考羅拔作品：「兩部戲都搵我抄羅拔迪尼路？多謝咁睇得起我，羅拔係業界受尊重嘅演員。對我嚟講，王家衛開始時參考好多其他戲，好似學行學走一樣都要學。」
「點解要咁對我？」
不過學友不諱言與王導合作後，也不明白對方所需，並暗示雙方合作到此為止：「記得《阿》片有場戲做個抬頭簡單表情，拍咗六十幾次，拍到佢話：『算嘞！』就行開咗，我好唔舒服，同佢係朋友，點解要咁對我？自己分唔開，我都唔知佢點為之係好，呢個亦都係後來少同佢合作嘅原因。但王家衛都係好有才華同出色嘅導演。（咁《東邪西毒》係咪暫時同王導合作嘅最後一套戲？）應該係最後一部。」
睹阿梅片段眼濕濕
學友更自爆因拍攝電影《痴心的我》改變了一生，皆因邂逅了太太羅美薇，他說：「拍戲當真就會有手尾，拍第一部戲乜都唔識，以為真係要好真，結果影響自己一生！依家錫一萬次都唔再敢去發生咩事，戲完就完，當時感覺揮之不去，隔住紗kiss好奇，有時有啲嘢唔可以發掘。」座談會內也播放不少學友演出的電影片段，曾憑電影《喋血街頭》首次提名金像獎影帝的他看罷有關片段即搞笑說：「演得幾好呀！咁都冇，咁應該都冇啦喎！」當播出他與已故好友梅艷芳合作的《男人四十》片段，學友則大為感觸，不禁眼濕濕輕抹眼角。
文：影視組