曉積文絕世筍工做教練hea爆
【鍾沛霖首爾直擊】由英國前奧運選手Michael Eddie Edwards真人真事改編而成的《我要做鷹雄》即將上映，主演的「小鮮肉」Taron Egerton、「狼人」曉積文及導演Dexter Fletcher日前於首爾接受本報獨家訪問，大爆一人一個奧運夢！
曉積文（Hugh Jackman）近期改戲路於《我要做鷹雄》（Eddie The Eagle）片中演酒鬼導師，助Taron飾演的Eddie追夢做跳台滑雪選手參加奧運，二人月初孖住導演Dexter到首爾宣傳！曉積文與Dexter於訪問中自爆小時候都有奧運夢，前者最愛玩板球，曾想代表澳洲參加奧運，至於Dexter就自言由細到大都熱愛體操，想做體操好手，正當Dexter正經分享之際，百厭的曉積文即笑指：「其實你依家應該仲做到吊環！」之後齊齊扮展開雙臂，似足大細路！
增磅扮「鞋抽臉」
講到以高風險運動作電影題材，導演就回歸正經表示拍到頭痕，連身經百戰的曉積文都直言坐上90米高台驚到震，難怪於片中孭重飛，上陣多個跳台滑雪場面的新進男星Taron自爆嚇到面青。除了滑雪，Taron要為角色增磅及全程扮「鞋抽臉」，不過他自言黐鬚才最困擾！
另外，正當曉積文與動作場面之間幾乎畫上等號之際，他卻於《我》片中將動作巨星的生招牌過繼予Taron，讓對方玩盡所有跳台滑雪場面，問到會否心動想掉轉角色時，曉積文「秒答」：「唔想！哈哈！我記得拍訓練場面嗰兩日，我好開心，又聽音樂又成日笑，Taron就做晒所有嘢（滑雪場面）。有一次搞到導演都叫我扮睇吓雜誌，我一路睇一路諗，天呀！真係世上最筍嘅工作！」曉積文的爆肌動作場面不再「老是常出現」，今次換上寸嘴形象更見驚喜！
頹足半年冇試鏡
雖然拍得舒適又招積，但曉積文於記招上亦自揭追夢辛酸史，自爆初入行曾因舞台劇演員身份而被視為「Entertainer」，試過半年未獲任何電影試鏡邀請，一度要親自寫信求導演畀機會，頹到爆炸，同場演戲多年的Dexter都明言做演員九成時間都等人拒絕，所以今次拍成勵志電影大感榮幸！二人去到首爾，曉積文提到最欣賞當地的名導奉俊昊，Dexter就自言睇過導演朴贊的作品，現時拍戲都有作參考！