朱璇轉做打女單身唔恨嫁

曾奪得中華小姐冠軍的朱璇和名模Jocelyn昨日出席「apm復活彩蛋藝術花園」活動，二人齊以tube dress亮相，大騷香肩！而新鴻基發展(中國)有限公司董事馮秀炎亦有現身。朱璇透露已約滿離開TVB，並於年初簽約邵氏電影：「大家可能係電視上會少見咗我，但我都希望有機會拍電視劇嘅，（點解會離開？）因為我都希望拍電影，依家會多啲機會拍，之前就拍完《使徒行者》電影版，依家學緊揸槍、射箭，攀山、想試下做打女，我身手都ok，老師都話我有天分。」又謂如TVB有適合的角色，自己不介意回去拍電視劇。

同陳爽出遊晒太陽

問到很久沒見她公開亮相，是否與緋聞富二代男友湯珈鋮有結婚好消息公布？她說：「未結，未有結婚計劃，（男友未求婚？）冇，我仲係單身，（但之前影到你同男友！）咁我都要朋友嘅，所以復活節都係同陳爽佢哋去旅行，諗住去泰國或者三亞，有陽光嘅地方，但要就陳爽時間，佢要湊BB嘛。」又謂知道藝人王祖藍和太太李亞男早前去旅行，很羨慕他們二人由拍拖至今仍十分甜蜜：「希望佢哋快啲有好消息，（你恨唔恨嫁？）我唔恨嫁，想拍電影同讀書先，結婚對我嚟講係一件好遙遠嘅事，（想幾歲前結？）過多兩、三年啦，（30歲？）40歲啦。」

放大圖片	好姊妹陳爽常與朱璇結伴去旅行，預告復活節又再出遊！

Jocelyn復活節搵蛋

而Jocelyn透露會與老公Anthony在香港度過復活節假期，並預告會跟一眾好友玩尋找復活蛋的遊戲：「我會同Anthony一齊籌備，贏咗就可以獲得100蚊美金、100隻復活蛋或者禮券，（幾多人一齊玩？）10至12人，會喺我哋屋企附近嘅行山徑收埋啲蛋同布置吓，畀啲驚喜朋友，一齊開心玩一日。」談及早前於網上甫性感比堅尼相大騷美好身材，她謙虛表示自己每天均很勤力做運動，並謂跟朋友一齊Keep fit是十分開心的事：「做完運動個人好有energy，同埋我唔節食o架，仲食好多嘢，係食得健康啲，一星期做6日運動，每次做一個半鐘。」

文：名人組