王浩信飛車搵替身攬女冇花假
王浩信早前拍劇撞車入院，為了新劇再拍飛電單車戲，他直言未能親身上陣，只靠貨車拍攝揸電單車攬譚凱琪過電的劇情；至於郭晉安則抱得美人萬綺雯，噓寒問暖照顧「玻璃人」：「最怕就係佢有事唔出聲！」兩人都得享「溫柔」，唯獨是黃德斌被吊毒打，「刑」足兩日。
藝人王浩信、郭晉安（安仔）、萬綺雯（蚊蚊）、黃德斌及譚凱琪（Zoie）等走出錄影廠為無綫新劇《致命復活》拍攝外景，浩信及Zoie日前在西環拍攝飛電單車場面。早前浩信因拍攝此劇遇上撞車意外入院，此後劇組對他愛護有加，頻派替身上陣，惟浩信表示未有因上次意外留有陰影，期望可以親力親為：「咁對觀眾個說服力會高啲，可惜我未考到電單車牌。」
純真地錫錫
雖然車手替身為浩信包辦飛車爆破等場面，但揸車近鏡，因浩信冇牌不能真的在路上飛馳，只能出動貨車帶動完成飛馳鏡頭，不過，親親Zoie的工作卻不假手於人，浩信「親自上陣」，只見在車上環抱浩信的Zoie含情脈脈，電力十足，浩信應被電得如癡如醉！Zoie透露二人有感情線：「佢有一種伸張正義嘅感覺。（親熱戲？）冇呀，我哋好純真，係試過喺摩天輪上面錫錫。（佢太太陳自瑤有冇監場？）我諗佢有同太太講嘅！」
德斌遭毒打
另方面，昨日安仔、蚊蚊及德斌在屯門海水淡化廠拍攝《致》劇，安仔有幸再抱得美人歸，他將體重一百磅的蚊蚊抱起時卻大呻辛苦：「好驚，怕整親蚊蚊啲舊患。最怕就係佢有事唔出聲，所以依家次次都會問佢有冇事。」蚊蚊笑言安仔對她分外照顧，即使動作戲對手不是安仔，他仍會吩咐對手小心，蚊蚊說：「安仔話我係玻璃人，會同個對手講：『唔好搞佢喇，佢肋骨裂過！』」
至於德斌則將麥嘉倫打到頭破血流，他說：「我一樣畀人吊起毒打，仲拍足兩日，眼都爆晒，又要割肉，直頭酷刑咁，仲要灑鹽『乸』傷口，正式傷口灑鹽！」
文：影視組