任賢齊當黑險失全副身家
黑客殺入娛圈！任賢齊近日成為不法之徒的目標，他自爆私人電腦被入侵後有人偽裝太太電郵去信銀行，要求匯走「全副身家」，幸好最終被銀行識破！小齊了解事件後立即報警，並急急請律師向他持有戶口的銀行發信，加強關注其戶口，拒絕所有可疑匯款！
歌而優則演的任賢齊（小齊）昨日出席公開活動時自爆，早前成為不法之徒的目標，入侵他與太太Tina共用的電腦，險些被騙走「全副身家」，小齊說：「佢哋入侵咗部電腦，用Tina嘅電郵發信畀銀行，話我哋兩公婆好忙但又急需動用一筆錢，要求銀行盡快匯錢去一個戶口。銀行覺得可疑就打畀Tina，Tina得知後即刻搵我，知道冇啲咁嘅事之後就即刻叫銀行唔好匯錢。因為我同太太都係電腦唔叻，所以初初都唔知發生乜嘢事，而當時我又喺內地拍緊嘢，只能夠遙距去處理。當我返嚟香港之後，即刻去搵經理人公司嘅同事求助，最後發現原來有黑客入侵咗我哋部電腦，仲改動埋我哋啲密碼，發現之後我哋即刻去報警！」
發信銀行關注戶口
由於事態嚴重，小齊昨晨動用律師向其持有戶口的銀行發信，請銀行高度關注所有戶口，如發現任何不是小齊本人要求匯款的話，需要立即拒絕！問到不法之徒要求匯多少金額？小齊指差不多是整副身家：「講多你哋又唔信，講少又肉酸，唔想講實際數目。（知唔知有冇其他損失？）因為電腦有好多嘢，仲有一啲網上購物嘅戶口，所以暫時未知仲有冇其他損失。」
聽取律師公開事件
由於小齊的電腦內還有夫婦的身份證副本及小朋友的個人資料，未知不法之徒有否進一步盜用資料，令他們擔心不已，並希望不法之徒盡快收手！小齊亦有聽取律師的意見，主動公開向公眾交代一次事件，盡量避免其他問題出現。
文：影視組