朱千雪相睇求愛勁冧「四眼甜心男」

前港姐朱千雪（Tracy）自2012年當選香港小姐季軍後，備受無綫力捧，不過Tracy去年毅然向無綫請假一年，於中文大學修讀企業傳播管理碩士課程。有樣有家底有學歷的Tracy堪稱富貴港姐，但日常生活亦十分平民化，日前見她獨個兒到商場行街，雖然面對名店林立，但她仍不為之動容，反而到超級市場濕平買蛋糕，之後到餐廳與朋友慶生及睇戲，Tracy明顯春風滿面，心情靚爆。

邊食邊傾甚投契

「三高」的Tracy早前出席活動時自爆六年無拍過拖，觀乎緋聞男友亦只得馬國明及黃宗澤，感情生活認真淡如水。早前她受訪時透露持開放態度結識異性，更公開五大擇偶條件「鍾意食嘢、有安全感、有幽默感、細心及顧家」，並坦言幸福要自己爭取。想不到Tracy講得出做得到，日前得到袁偉豪女友兼同屆的前港姐岑杏賢介紹之下，展開「求偶大作戰」！

朱千雪與「四眼甜心男」傾到手指指，冷落了岑杏賢。	眾人於餐廳內邊食邊傾，氣氛愉快。	「四眼甜心男 」與岑杏賢落車買糖水，傾到笑晒口。

日前晚上六時許，Tracy駕車到灣仔某停車場，然後步行至銅鑼灣會合一名女友人，繼而到餐廳用膳，並會合岑杏賢與其他朋友。原來岑杏賢充當媒人，安排Tracy與一名「四眼甜心男」見面。見二人打招呼後，便開展相睇之旅。男方十分細心，不時關心Tracy選擇甚麼食物，似乎想探聽Tracy口味。經過一輪了解過後，見二人傾得甚為投契，不時邊食邊講邊笑，感情已更進一步。

另一日，朱千雪到超市揀蛋糕，更用手機影低問朋友意見。	買完蛋糕，朱千雪會合女友人去睇戲。	「三高」朱千雪有樣有學歷有家底，但自稱感情dry足六年。

唔夠喉再食糖水

享用晚餐後，似乎仍未夠喉，Tracy、「四眼甜心男」及岑杏賢到大坑食糖水，甚有紳士風度的他與岑杏賢到糖水舖買糖水，Tracy則留在車上。等外賣時，他與岑杏賢密密傾，似乎「四眼甜心男」與岑杏賢討論剛才的「攻勢」是否順利。二人買了外賣立即上車，然後由Tracy充當司機送眾人回家。

昨日本報致電Tracy，問她是否與「四眼甜心男」發展中？她說：「佢係我哋其中一個好朋友，只係大家成班朋友食飯，大家諗多咗。（有冇發展緊嘅男仔？）多謝大家關心，了解吓了解吓，第日如果有再同大家講。」至於岑杏賢則表示：「個男仔係我哋嘅共同朋友。（個男仔有冇女朋友？）咁呢層我就唔知啦。」

文：專案組

攝：追蹤組