甄子丹墮坡險撼石 九死一生
甄子丹今年已是第四度連任打吡大使，適逢今年又剛榮升做馬主，與馬匹可謂份外有緣，他拍策騎戲時甚至經歷了九死一生的驚險場面，幸憑好身手，化險為夷。工作忙到癲的他需於短短幾天時間內橫越半個地球兩次，Jet lag到要帶備安眠藥傍身，可見宇宙最強之路實在不易行。
剛榮升做馬主的甄子丹與馬匹的緣分早結在2005年，當時拍攝電影《七劍》的他首次習騎術，克服「男人最痛」後，他順利在開工時忘我奔馳，直言出戰打吡大賽都贏！不過同時他因策騎而經歷生死關頭，曾與女拍檔攬住飛落山墮地，險撞大石。
「第四度連任打吡大使當然係好開心，好榮幸，打吡大賽係每年馬季最矚目嘅盛事之一。至於點解會搵我出任大使？可能同我嘅形象有關，我同馬一樣咁有魄力同衝勁。我鍾意馬，其實我係鍾意動物，自己拍戲都成日會接觸到馬，同馬有交流。做馬主係Karson（妹夫蔡加讚）提議嘅，佢話不如兩份喇。我自己係馬會Member，賽馬係好多香港市民共同嘅大眾娛樂同消遣嚟，自己都想參與吓。」
嘆男人最痛
「第一次接觸馬係拍電影《七劍》時，我喺戲中飾演大俠要策騎，我完全唔識騎，徐克導演搵咗個蒙古嘅馬伕教我。啱啱策騎嘅感覺對我嚟講，係男人最痛，我諗金鐘罩都係咁練番嚟！學咗2星期就正式拍奔馳戲，要同黎明、楊采妮一齊奔馳，佢哋兩個都有晒經驗，我就新手，不過我係大師兄嚟，大師兄梗係唔可以跑最尾咁肉酸，我就咩都唔理係咁衝呀衝，跑呀跑，直情到達忘我境界咁，咁嘅狀態如果我去出戰打吡大賽我都贏呀，只要一嗌roll機就得。」
與馬匹交流
「講番策騎啲驚險嘢，都係拍呢套戲，我同女主角嘅替身一齊拍，佢唔識騎術就好驚。嗰場戲導演叫我衝上山坡再跑落嚟，個女仔坐我後面攬到我好實，導演一嗌roll機我即刻大俠上身，一路跑個女仔就愈箍愈實，我就愈難控制到匹馬，因為我個身幾乎郁唔到。跟住我哋就好似摔角手咁攬埋一齊飛落山，飛落山之際我見到舊大石，身下面係個斜坡嚟，心諗呢次死梗，嗰刻我即扭身嚟卸力，之後就撞落地，好彩個女仔識答我冇事，我個心安樂晒。我望番舊石只係距離我半隻手位，撞過啲都係咁先，可以話係九死一生，嗰次真係好驚，好驚險！我覺得馬好有靈性，其他動物都有靈性，我拍戲時都會同啲馬交流，求吓佢，叫佢畀吓面，唔好摔我落嚟。」
忙到甩轆的甄子丹經常為工作周圍飛，陪家人的時間自然較少，但他慶幸發達的科技增加他和家人聯繫的時間，賢內助汪詩詩亦會為他安排學校的親子活動，助他參與子女的成長，成功兼顧工作和家庭。
「呢排都係忙緊拍同雲狄素（Vin Diesel）合作嘅電影《3X反恐暴族3》（xXx：The Return Of Xander Cage、《3X3》），成日要飛嚟飛去，飛得最甘嘅一次係我今次返嚟兩日之後就要再飛去南美洲拍兩日戲，拍完兩日後就飛返香港，再飛上海出活動，之後再回港出席『寶馬香港打呲大賽』，喺幾日內橫越半個世界兩圈，來回飛成60幾個鐘。因為嚴重Jet lag，我都帶定安眠藥。」
參與子女成長
「其實自己成日都失眠，我好多嘢諗，諗拍戲、工作，屋企。好彩現今嘅科技發達，我同太太可以廿四小時聯繫。我好好彩有好多family support，外父外母喺香港，佢哋會幫手照顧小朋友，屋企好熱鬧，畀到好多愛啲小朋友。我每次返香港，太太都會幫我安排啲學校嘅親子活動，想我知道啲小朋友係點成長。我早前就去咗個女間學校演講，講拍電影，我喺講座之前嗰晚失眠，好大壓力呀！講太深會唔明，講得太簡單又好似冇講過咁。」
兄妹檔拍住上
「今年我妹妹子青返香港發展，簽咗我公司旗下。我自己有製作公司，拍過好多女仔係打嘅，好似電影《千機變》嘅阿Sa（蔡卓妍）同阿嬌（鍾欣潼），香港同內地都有，發覺缺少真係打得嘅女演員。我問子青有冇興趣返嚟發展，呢個圈想見到有真材實料嘅演員，佢之前都有拍過兩部戲，其中一部係《見習黑玫瑰》，有演出經驗。」
甄子青打女闖娛圈 師承媽咪
甄子丹親邀妹妹甄子青返港發展，讓妹妹在娛樂圈中大展拳腳，力捧妹妹做新一代女打星。子青說：「自己都有興趣，由細到大都有跟媽咪出去表演，我喺LA都有拍過戲，我同哥哥嘅功夫都係媽咪教。」子丹即大讚母親功夫了得，他說：「我媽咪係一代宗師，佢啲功夫好勁，如果佢仲在生，我一定搵佢拍戲。（媽咪有冇用過佢啲功夫招呼你？）屋企啲棍斷晒啦。（拍戲對妹妹好高要求？）會o架，我對屋企人特別嚴，唔想人哋覺得我偏私。」子青說：「就算哥哥對我嚴啲要求高啲，我都知佢係想我好。」
文：張嘉敏
化妝：諺瞳·小白
髮型：Kenji Ng@IL COLPO PP
Styling：Harry lam
服裝：ETRO（甄子丹）、 CY FUSION （甄子青）