鄧愛嘉爆父恨抱孫 隨時準備生
碧咸太太Victoria Beckham來港主持自家品牌專門店開幕，吸引不少名人前來朝聖，名媛鄧愛嘉大讚碧咸嫂唱得、跳得兼設計得，是犀利人妻典範，而發福的她，笑言隨時準備做媽咪，雖然自己唔急，但知道爹哋恨抱孫。
碧咸嫂的自家品牌亞洲首家專門店昨日在港開幕，晚上於中環舉行晚宴，七時許碧咸嫂由保鏢及工作人員陪同下抵達，她從會場旁邊的時裝店搭升降機直入，未有受訪，出席嘉賓包括奧斯卡影帝艾哲倫保迪（Adrien Brody）、設計師Kenneth Cole、鄧永鏘女兒鄧愛嘉、歌手李玟、Moiselle創意總監陳栢熹、賭王何鴻燊四房兒子何猷君和名媛萬寶寶等陸續到場。
阿媽畀生仔秘方
鄧愛嘉與老公Christopher Owen恩愛到場，表示去年碧咸嫂來港出席慈善晚宴時跟對方有一面之緣：「覺得佢好犀利，唱得，跳得又design得，佢喺Spice Girls時已經有留意佢，（係咪留意埋佢老公碧咸？）唔對佢老公有興趣，我老公對佢老公就有興趣，（同佢講吓時裝經？）佢個人幾靜，爹哋（鄧永鏘）同佢熟啲。」現場見她較前發福，她笑言只是胖了，並未有好消息公布，又指身邊朋友都相繼有喜，自己亦隨時準備做媽咪：「我冇急，但ready，媽咪都想抱孫，如果有（BB）媽咪會幫手湊，會畀生仔秘方我，同埋見到爹哋同一班小朋友玩，覺得佢好恨抱孫，不過佢冇親口講過。（依家努力造人？）未開turbo，依家搞生意好多嘢做，要三思，順其自然，或者等朋友生第二輪先，自己一個生好悶，等佢哋生第二胎，我先生第一胎。」又透露會與其他好友為名媛密友邢嘉倩搞baby shower迎生派對。
李玟請教「密」計
同場李玟穿上碧咸嫂的設計現身，讚對方是很成功的設計師，要向對方學習：「佢係我style icon，希望佢多啲嚟香港，有樣嘢好想請教佢，佢同碧咸都係大忙人，成日飛來飛去，點樣可以保持咁sweet咁親密，（請教埋佢生仔？）問咗先，問咗話畀大家知。」她透露昨日剛從長沙錄影「我是歌手4」回港，講笑指早前失聲要用假音說話及唱歌，似足曾志偉一樣，幸得媽咪施針灸及飲中藥治療，最開心是收到不少歌手為她打氣祝福，又透露與歌手蕭敬騰合唱電影主題曲，大感榮幸。
文：名人組