方力申憔悴講分手兩度落淚

「金童玉女」方力申（小方）及鄧麗欣（Stephy）前天透過經理人公司發聲明宣布結束十年情，震驚全城！女主角Stephy現時身在外地療情傷，至於男主角小方昨日就單拖出席慈善美食活動記者會，為分手事件後首度現身，吸引近半百記者到場採訪。受訪剖白兩人分手詳情時，小方幾度哽咽，講到傷心處更忍不住兩度流下男兒淚，令人心酸！

公布一刻勁手震

小方以一身黑色西裝上陣，比原定時間遲了約十分鐘現身的他明顯心情沉重，與大會安排的兩個小朋友合照時才強顏歡笑。埋位訪問前他先抬頭望天，深呼吸後才正式開腔，介紹完活動內容後，他正式入正題：「其實我同Stephy係地下情開始，好耐先畀人影到，我哋先至公開，既然開始係低調，本來分開都想低調，但尋日收到好多關心我哋嘅朋友嘅短訊。我哋兩個知道十年係好長時間，要公布嗰刻我自己係攞住電話睇住時間，我手係震得好犀利。」

悲傷	沮喪	鄧麗欣與方力申十年情告終，令不少人驚訝。

此時小方哽咽續說，坦言兩人在電影《紀念日》上映前已出現問題：「但係我哋冇選擇公布，怕有啲唔好心地嘅人會攻擊我哋，話我哋係電影宣傳，第二係我哋兩個真心好珍惜我哋呢段感情，所以……」此時他不禁邊流淚邊講：「所以我哋決定有個冷靜期，但期間我哋兩個都經常出嚟傾偈，都有講到傷心喊，而我哋最後一次傾偈係十周年嗰日，之後就和平分開，所以我哋掹車邊真係到咗十年，好感恩。」

方力申和鄧麗欣在電影《紀念日》中不乏嗌交場面。	心情沉重的方力申，只跟小朋友合照時才稍露笑容。	活動結束後，方力申使出調虎離山計，七人車（圖）帶記者遊花園，最後落車只見其同事。

講到分手原因，小方否認與第三者或結婚有關：「係解決唔到嘅問題，結唔結婚唔係我哋兩個嘅分歧。（唔關第三者事？）聲明同Stephy都講咗唔關第三者事。（解決唔到嘅問題係關性格事？）對於我嚟講，問題唔重要，結果重要啲。（邊個提出分手？）係我哋兩個嘅決定。（有冇轉機？）將來嘅嘢冇人知。（有冇挽留過？）三個月冷靜期當然有試過。（幾時正式分手？）個幾星期前。（十周年即係幾號？）唉，都過咗。」

講緋聞：傷口灑鹽

對於有報道指他用座駕載兩洋妞，他表示：「嗰張相係影唔到車裏面嘅人，就可以講話我唔好嘅嘢，我覺得係喺我傷口灑鹽。」此時他又再度灑淚。而問到《紀念日》可是分手導火線？他坦言拍攝時都曾擔心會有影響，結果可能真有受到影響，但他謂以後仍有機會跟Stephy合作，現亦有跟對方保持聯絡：「佢都有message我，同我講唔好意思，要我一個人面對咁多人。（依家同佢聯絡感覺有冇唔同？）身份唔同咗。」他亦表示決定了分手才告知父母，而父母對分手亦感非常可惜。

調虎離山避記者

訪問完畢後小方開始活動，期間回復專業態度。活動結束後他乘坐七人車離開，但期間使出調虎離山之計，七人車帶記者遊足個多小時花園，最後落車只見其同事，但不見他蹤影。另外，雖然小方不肯透露確實分手日期，但Stephy曾在本月9日於Instagram上載鮮花相，並意有所指留言：「花的意義是它為你設定限期，讓你更珍惜它燦爛盛放的時刻。」時間跟小方口中的個多星期前分手不謀而合。

文：音樂組　

攝：追蹤組