甄子丹愛駒首出賽胞妹瞓身撐
甄子丹首次帶同親妹甄子青公開亮相馬場活動。他表示妹妹已簽約他公司旗下，又大讚妹妹從小習武，功夫了得，會安排妹妹參與電影演出，看來他銳意要力捧愛妹成新一代女打星。此外，昨晚他與襟兄弟蔡加讚的愛駒「宇宙車神」首度在港出賽，更為了捧場，延期飛到南美會合雲狄素。
「宇宙最強」甄子丹昨日出席於跑馬地馬場舉行的2016《寶馬香港打吡大賽》獲選參賽馬匹名單公布會。今年子丹已是第四度連任打吡大使，今次還帶同親妹甄子青公開亮相。子丹大讚妹妹說：「子青佢功夫好勁，娛樂圈要搵打女好難，我特登搵佢返嚟，簽咗我公司，佢係由細練到大，功夫上超越好多人，會安排佢參與電影演出。（兄妹檔演出？）睇我太太嘅安排，佢對每個人都好fair，都要靠自己努力同實力。佢哋本身有potential先會簽佢哋，唔會因為佢係家庭成員。」足見他愛妹情切，看來要力捧妹妹成為新一代女打星。而40歲的子青身形keep得不錯，被讚保養得宜。
親自到場打氣
而子丹與蔡加讚的愛駒「宇宙車神」昨晚初次在港出戰賽事，他謂會到場打氣，心情不會特別緊張：「出賽志在參與、玩吓，如拉到頭馬梗係開心，拉唔到都唔會唔開心。（有無信心？）每個馬主都對自己嘅馬有信心，唔係都唔會投資咁多落去。（係咪同加讚揀隻馬揀咗好耐？）都係交畀我太太搞，自己無咩時間，睇相見到隻馬身材好fit，好多肌肉，同我差唔多。」而他妹妹子青亦表示一定會落注支持哥哥的愛駒，子丹笑言：「佢成副身家瞓身落去，講笑，少少玩吓啦。」
延期飛往南美
子丹繼又透露原定昨晚就飛去南美洲繼續拍攝與荷里活男星雲狄素（Vin Diesel）合作的電影《3X反恐暴族3》（xXx：The Return Of Xander Cage、《3X 3》），他說：「依家改咗schedule聽日飛，呢排好難操fit，部戲入面全部演員都好大隻，我代表中國演員要keep fit啲先得。（有無壓力？）無，上次同泰臣合作都係咁，今次同Vin Diesel係另一次體驗。（操到幾多舊腹肌？）OK o架，爆衫喇。」
問到太太是否鍾意他的肌肉？子丹說：「佢鍾意我有啲肚腩仔，覺得個人穩重，我話做呢行唔得。其實我好鍾意食嘢。」另外，問到他主演的電影《葉問3》在內地票房被指造假，他說：「做演員做好自己本分，電影嘅嘢唔同地方有佢嘅發行方式，呢部戲破咗好多地方嘅票房紀錄，同埋得到電影獎項嘅提名。票房都係浮雲嚟，最重要係觀眾睇完嘅感受係點。」
文：名人組