文凱玲舞裝突擊「底」佢贏
文凱玲昨日以一身芭蕾舞式性感打扮亮相新片首映禮，與何浩文「打情罵俏」時不慎走光，成功搶去周秀娜不少風頭！另一主角鄭伊健與周秀娜雖然再度合作，但拍攝親密戲時仍大感尷尬，更承認彼此有「身體接觸」。
由周秀娜、鄭伊健、何佩瑜、何浩文（Dominic）及文凱玲（Connie）等主演的新片《iGirl夢情人》昨晚舉行首映禮，一班女星悉心打扮鬥搶鏡。鍾采羲（Iris）晒事業線又露腰，但論性感度仍不及晒長腿的Connie，相反周秀娜打扮密實，似乎刻意讓賽！
席上，一班男、女主角鬥擺甜蜜甫士，Connie被Dominic抱起時不慎露出打底褲，搞到她一臉尷尬，不停用手整理衣服！事後，Dominic受訪時仍「死撐」﹕「事前我哋夾好咗，況且知佢有打底，我覺得個畫面好靚、好Sweet！」Connie則尷尬地說：「今日着咗兩條裙再加打底褲嘅。（點解咁尷尬咁郁嚟郁去？）我想整好啲條褲啫！有Dominic睇住我好放心。」
伊健爆有貼身親密戲
至於最近被傳搭上富二代兼突然富貴的周秀娜，連聲否認緋聞：「冇富二代朋友！我仲係單身，唔擔心緋聞影響形象。（話你突然富貴？）我生活正常，負擔到自己亦養到父母就得。（舊愛話如果你拍拖就祝福你。）我冇舊愛！（前男友？）話明前男友，都過咗好耐，唔講喇！」不過談到戲中與鄭伊健的互動，扮演機械人的她即笑說：「要拉硬個人嚟演，總之收工就覺得好倦。」鄭伊健則承認與周秀娜有親密戲：「有場戲講佢冇晒電，我要抱起佢，仲抱咗好多次先拍完。因為係第一日開工，所以都尷尬。（有身體接觸？）有啲！（掂到佢個胸？）冇咁誇！」
文：影視組