攞正牌入劍橋麥明詩被屈白撞
畢業於英國校劍橋大學的麥明詩（Louisa），日前返母校為無綫拍特輯，昨日凌晨有學生會網站爆出，Louisa與攝製隊在舞會取景時，傳因未有授權兼有人「白撞」被驅趕離場！Louisa解釋是在雙方協議底下完成拍攝，沒有被趕走之事，更笑言只是小事一椿！
「十優狀元」兼今屆香港小姐冠軍麥明詩，於英國劍橋大學法律系畢業，早前隨無綫攝製隊返回母校拍特輯《星星探親團》。昨日凌晨由劍橋學生所設立的網頁《The Tab》顯示，指當時大學正舉行「Cambridge Union Society （劍橋聯合會）The 2016 Spring Ball」，Louisa與攝製隊到達舞會，期間傳出「有人」不斷攞酒飲，被懷疑「白撞」呃飲呃食，經商討後邀請Louisa及攝製隊到辦公室了解。而網頁亦透露拍攝過程未取得授權，最後由保安護送離開，內容用上「Kicks out（踢走）」、「She was an imposter（佢係冒充者）」、「actual Miss Hong Kong has much better teeth（香港小姐應該有更好的口才）」等字眼。
「唔覺被人整蠱」
昨日Louisa在instagram亦轉發劍橋帖子，她昨接受本報電話訪問透露，事前已向學生會申請拍攝：「去到工作人員都有畀手帶我哋識別，亦特別帶我哋參觀，又搵番學院教授。我哋都拍咗成45分鐘，傾完覺得夠就離開。（唔開心？）冇，好小事，呢個學生網頁風格係輕鬆搞笑為主，出嚟拍嘢都會遇到呢啲情況。（鋒芒太露被整蠱？）唔覺得被人整蠱。」再問是否因有人嫉妒她而傳出被趕走？她說：「絕對冇咁嘅事，因為所見嘅同學都好熱情對我，大部分同學原本都唔識我，絕對冇妒忌呢個問題。」
節目監製張志明亦否認「被趕走」：「有手帶畀佢哋入去拍，嗰啲嘢食都係人哋隊埋去畀佢哋食，佢哋初頭拍得好開心，覺得嘩有個香港小姐過嚟，好開心有隊crew。」不過張志明表示因晚會上有人飲醉，為保障飲醉者，故請Louisa等人離開：「佢哋其他人飲醉酒後，就講話唔係好想我哋喺度，跟住叫咗我哋走，完全有申請。（網頁附上照片？）呢個係party裏面，個男仔係學生會主席，你見佢係咁攞嘢畀麥明詩食，拍嘢時氣氛好好。」
無綫：獲授權拍攝
而無綫企業傳訊部副總監曾醒明稱要還Louisa及攝製隊一個公道，他指循正式程序申請拍攝舞會，並已獲批准，舞會主席James Hutt提出因有攝製隊在場會令同學拘謹為由要求拍攝結束。
身為Louisa男友的林作，對女友被屈坦言要聲援：「佢今朝有打畀我講番件事，講真佢冇嬲，只係得啖笑！我肯定佢做足申請，純粹係嗰個學生會主席低估咗麥明詩風頭，以為人哋細嘢嚟採訪，自己就威威豬，點知拍落個個都識得我女友，佢咪發難囉！呢啲學生辯論會非大學組織，個主席做三個月貨仔，佢今次應承畀拍攝又半途反口，個學生網站更加唔使理！」
文：專案組
採：影視組