48歲吳婉芳親揭凍齡之謎
現年48歲的前港姐吳婉芳前日在馬場為愛駒拉頭馬，其短裙造型，青春逼人，與30年前對比，完全冇走樣，此事即被網民瘋狂討論，並封吳婉芳為無添加「超級凍齡美魔女」之首。對於獲網民大讚，吳婉芳受訪時謂從無刻意保養，每日打坐是其養生之道，她又會保持心境開朗，以正能量面對不快事。
最強娛樂資訊App《東網巨星》前日報道向來低調的吳婉芳和丈夫胡家驊現身馬場，吳婉芳參選港姐至今30年依然省鏡，報道並回顧30年來美魔女成長史等消息，之後《東網巨星》Facebook隨即轉發及建立多個帖子，立刻引來全城網民洗版式瘋狂討論，在不足24小時已有超過一萬個分享及讚好，成為全城熱話！
內地瘋傳消息
吳婉芳18歲參加1986年港姐得亞軍、最上鏡小姐及才華小姐，當年已經靚爆鏡，1993年她與拍拖七年的胡家驊結婚，婚後誕下二子一女，大仔現已22歲。相隔30年，吳婉芳保養得宜，前日在馬場以短裙Look現身，充分顯示自己被「凍齡」，其面容全沒改變，更沒整容痕迹。
極受網民關注的吳婉芳，昨接受本報訪問時大感驚訝：「我一起身個WhatsApp已不停響，啲朋友不停Share條link畀我睇，內地啲朋友都知道，好誇張，搞到我好驚。」問到保養心得，她謂從不刻意護理：「我好懶，又唔做運動，早前見啲朋友，佢哋成日行山，我先話都應該同佢哋一齊行山做運動。（飲食方面？）好少食補品，亦唔會食燕窩，食得好清淡，但飲好多湯，都係家常例湯。同埋我唔食煙，唔食煙對皮膚會好啲。（護膚呢？）一星期敷兩、三次面膜，但我洗面一定會洗得好徹底乾淨。」
吳婉芳續指心境開朗最重要：「每個人都會遇到開心、唔開心嘅事，我比較阿Q精神，凡事唔會咁執着，要有多啲正能量，睇吓佛經，令心境平靜，同埋我會打坐，呢啲係我嘅養生之道，雖然已有六、七年，但仲係初哥，每日畀啲空間自己靜落嚟，又有睇中醫調理。」
入賭場被查證
「凍齡」亦令吳婉芳遇過不少趣事，她謂：「兩年前試過同朋友入賭場，當時有個外籍職員要查我身份證，我都有啲愕然，之後有個中國人應該認得我，所以唔使我證明。又試過過海關畀人檢查完證件後，離開時再叫我個名，好彩我有望轉頭，朋友話佢哋可能懷疑我係咪證件上嘅人。」
談到現成為網民心目中的美魔女人氣榜首位，吳婉芳謙虛說：「唔好玩我啊，其實我好老，你近睇就見到啲皺紋。（老公一頭白髮，會否嫌你太後生？）冇，我覺得佢啲白髮好有型，好鍾意佢咁樣。」
文：名人組