《發哥有Say》：周潤發懶理片酬 拍戲求開心
【陳偉立北京直擊】神級影帝周潤發連續三年現身賀歲片檔期，為粉絲帶來歡樂！發哥繼續在《東網巨星》的全新節目《發哥有Say》第二集大談拍《賭城風雲Ⅲ》趣事，當中發哥分飾「贏盡天下無敵手」石一堅及賭神高進，fans聽到都興奮。對於外間看好票房能收逾15億元人民幣，發哥處之泰然，希望各套賀歲片都有好成績，皆大歡喜。另外，獲發哥點名最佳拍檔的鄭裕玲（嘟嘟），踢爆發哥為入戲，當時拍緊拖都將與她的親密合照放在銀包，又大讚男方非常照顧拍檔。
影帝周潤發在1989年的電影《賭神》堪稱經典，前年發哥與導演王晶再度合作賭片系列，但發哥改為飾演「贏盡天下無敵手」石一堅，《賭城風雲II》最後一幕，賭神高進「真身」出場，令fans集體回憶湧現，今次《賭城風雲Ⅲ》石一堅及高進更會齊齊對抗奸角張學友，兩位發哥同場叫人期待！
發哥早前在北京接受《東網巨星》專訪，在《發哥有Say》第二集亦大讚《賭Ⅲ》笑料處處，與張家輝、張學友、李宇春、劉嘉玲都有新火花，學友破格長髮look夠吸睛，家輝又「化骨龍」上身搞搞震，而且集齊搞笑、友情、槍戰、賭枱比併等元素，問到票房期望，謙虛的發哥表示不敢多想，希望與對手的新片均有好成績。
難忘家輝獄中施法
記者：《賭城風雲Ⅲ》有個賣點係高進同石一堅同場，覺得個gimmick如何？
發哥：某個程度上石一堅唔夠張學友鬥嘅時候，就出現高進江湖救急，高進聞到學友陣除，就出嚟頂住！咁石一堅唔係賭神嚟嘅，高進先係賭神，演繹上都唔會難嘅，賭神已經有個mode，石一堅就搞笑啲，冇賭神咁cool。
記者：今次有咩必睇位推介？
發哥：多咗啲香港80年代經典場面，例如《監獄風雲》呀、許冠傑歌曲呀，呢一套電影有幾場懷舊嘅戲都幾得意。
記者：拍攝幾個月，有冇邊幕係最難忘？
發哥：有場戲我失憶後，張家輝喺監獄度用法術、武林秘笈救我係幾好笑！但救極我都唔醒。
記者：票房方面，老闆于冬話有信心收15億元人民幣，發哥你點睇？
發哥：呢個我唔識睇，順其自然，舊年有10億，如果按照佢哋所講，螢幕每年都增長幾千個，加加埋埋，應該都有，希望啦！要睇天時地利人和，今次對手都幾強！有《西遊記之孫悟空三打白骨精》、周星馳嘅《美人魚》，仲有《功夫熊貓》，應該幾熱鬧！觀眾睇晒幾套都冇咩所謂呀！平分天下嘛！
收入贏荷里活巨星
去年八月，美國權威財經雜誌《福布斯》公布2015年度全球最高收入男星排行榜，發哥被指收入約1.4億港元，排名第24位，撼低不少荷里活巨星，非常威水！曾笑言財產交予太太保管的發哥，講過出街不會帶現金，對金錢亦沒有甚麼追求，反而更享受工作的快樂。
記者：舊年打入福布斯收入榜第24名，心情點？
發哥：咁誇張？但呢樣對我都唔係咩鼓舞，工作係我分內事，就係因為我鍾意喺片場嘅感覺吖嘛！你賺幾多片酬，你都用佢唔到，我志在喺片場享受o架啫！第幾名其實冇咩意思。
昨日周潤發夫婦被指有一名養子，對此周太陳薈蓮回應：「唔係事實嘅嘢，唔回應。」
文：影視組
攝：秦健輝