嘟嘟爆發哥藏密照 難忘齊瞓街

嘟嘟表示當年跟發哥連續拍《網中人》和《親情》，加埋相處了一年多：「《網中人》拍咗9個月，我哋真係試過攰到喺條街到瞓。之後套劇好收得就開拍《親情》，好彩我五十幾集就瓜咗，不過都拍咗半年，所以加埋對咗佢一年幾。」她亦踢爆發哥入戲秘技：「《網中人》我哋做情侶，未開工前我哋影咗啲親密照，佢特登曬幾張2R相擺喺個銀包度。（有冇暗喜？）冇諗呢樣嘢，嗰陣佳視執咗，好彩TVB搵我。（所以唔理男女私情？）做嘢還做嘢。佢嗰陣同陳玉蓮拍拖，我都有問佢驚唔驚女朋友唔鍾意，佢就解釋因為我哋唔係咁熟，但又要做一Pair，所以先咁做。」

冇對方電話

此外，嘟嘟亦大讚發哥十分照顧拍檔：「有次《火鳳凰》我哋喺九龍塘揸跑車拍外景，我嗰日唔舒服，但唔敢同導演講，但發仔好似半個屋企人，所以同佢講我唔舒服，跟住佢就即刻車我去藥房買藥。」期間嘟嘟亦呼籲發哥上其節目受訪：「發仔，大家合作咁耐，你都60歲人，可以想當年嘅人有幾多，你嗰陣仲未喺荷里活、內地，而係大家仲青春、捱緊嗰陣，希望你可以上嚟緬懷吓。（佢話你依家都有黃子華？）佢笑住講啫，佢乜都知。」不過嘟嘟則謂沒有發哥電話：「得fax，仲要只係fax到佢經理人。（去九龍城撞佢？）點撞呀？不過多年前我喺西貢拍《男親女愛》片頭嗰陣真係撞到佢。」

文：音樂組