林峯被射濕嚇到O嘴

「Chok王」林峯將於4月29日至5月1日假紅館舉行一連三場《HEART ATTACK LF LIVE IN HK林峯演唱會》，昨日他出席演唱會記招，預告開騷會玩驚喜，與歌迷近距離接觸，面對面唱歌給峯迷聽。問到可會除衫騷肌？他笑言本身大汗，到時熱便會除衫。期間英皇高層吳雨上台，笑言演唱會製作費令他「Heart Attack」。之後他反為林峯送上驚喜，當林峯在電話輸入數字後，兩人身後即噴出30呎高的巨型水柱，林峯見狀即嚇到O嘴，更被噴到背脊盡濕，吳雨更抵死笑言：「搞到我濕晒！」場面搞笑。

開騷無限budget

對於演唱會舞台效果，受訪時林峯指之前玩過水和火，現仍在研究當中。講到製作費，他則謂沒有上限：「我從來冇擔心製作費，多謝大哥（吳雨）、老闆（楊受成等）咁全力支持，大家都希望可以畀香港觀眾睇有質素嘅嘢，所以每次開會唔會諗budget，而係睇有咩idea可以夾到。」他更於半年前已開始構思嘉賓名單，希望能有新鮮感。

吳雨送驚喜，待林峯於電話輸入數字後即噴出水柱。	林峯感謝公司支持，直言製作費不計成本。	林峯獲粉絲預祝開騷爆滿！

而密密操肌的林峯，自爆開始頭三日辛苦到邊沖涼邊嘔：「我提早四個月操就係想身體習慣。（想操到咩效果？）十幾年嚟都未試過有咁多時間操，都唔知可以操成點。（想要人魚線？）梗係希望啦！肌肉唔難操，最難係要收乾身，呢樣嘢要戒口，依家開始戒糖同食清蒸嘢，遲啲連鹽都唔食得。」

女友滑雪弄傷頸

但講到女友吳千語很愛吃，林峯則謂已跟對方約法三章：「同佢講你食好，唔好叫我食。」而講到兩人日前去北海道旅行，他透露兩人每年都會去滑雪，今次則與細佬等人同行，更爆千語滑雪時弄傷頸：「不過冇乜大礙。（幫佢按摩？）我唔敢亂摸，費事愈整愈傷。（你都有去睇脊醫？）我定期會睇，間中check吓。」而對於音樂人好友鄧智偉被《好報》踢爆跟高海寧秘戀，他笑言不知道，兩人平日只談工作與音樂。另演唱會門票將於今天起公開發售。

文：音樂組