吳千語初會周星馳唔敢示愛
女星吳千語、譚耀文、莊思敏、關寶慧、莊端兒、黎美言以及黃百鳴等，前晚出席《家有囍事》修復版特別場。黃百鳴透露原定安排該片於旗下戲院上映，未料到其他戲院亦對《家》片有興趣，屆時將有多達卅間戲院放映。《家》片雖然上映日子比賀歲檔早一星期，仍難免與其他賀歲猛片對撼，黃百鳴說：「唔好話對撼，係畀觀眾多一個選擇。（預計票房？）我哋對票房冇壓力，都冇乜所謂。」
林家拜年諗送乜
1993年出生的千語，比1992年上映的《家》片還要年輕，但她每年都會睇電視重播，笑言自細已是周星馳粉絲，試過有次與男友林峯吃飯時遇上星爺，星爺還主動打招呼兼埋單，千語說：「不過我驚打擾佢，所以就唔敢打招呼同合照。（冇介紹自己？）冇，冇表達到我嘅傾慕之情，但已經好開心。」問她會否與男友一起度歲？她說：「佢要準備演唱會，但都希望可以去佢屋企拜年，依家仲諗緊送乜賀年嘢。」
莊思敏重睇震撼
莊思敏則以性感新裝造型現身，hot爆全場，談到《家》片時，她說每年都睇重播，大大話話睇了近二百次，已耳熟能詳，今次首度在戲院支持，未料現場氣氛令她更為投入：「原來同大家一齊笑都好震撼，不過呢個組合搵唔番，好似張國榮咁，未曝光片段都好得意。」
至於譚耀文在修復版中為已故巨星張國榮配音，這個安排令他感到榮幸：「我出道都係扮佢，陌生咗咁多年都有啲難，黃生想搵個把聲盡量似張國榮嘅，好榮幸揀咗我。（過程最難係乜？）要好有活力，但嗰時我拍完《葉問3》把聲好攰，要喺同一段時間入番佢個感覺。」
文：影視組