林峯Chok住入閘唔識嘟卡
歌手林峯昨日快閃式殺入旺角、金鐘及中環港鐵站巡視個唱廣告牌，相隔至少五年再搭港鐵的他十分論盡，先有買完車票後忘記找錢，入閘時又不知道新款車票可以嘟卡，對此他自嘲是「大鄉里出城」！而全程出巡亦吸引粉絲聞「峯」而至，最高峯時引來近百途人圍觀，更塞滿成卡車廂，場面墟冚。微服出巡的林峯亦十分親民，與粉絲近距離接觸，更預告個唱與粉絲距離可能會更近！
「Chok王」林峯將於4月29日至5月1日第五度登上紅館，舉行《瑞士依波路表160週年呈獻 HEART ATTACK林峯演唱會》。為此英皇特意豪擲逾7位數進行一連串宣傳，除買下紅隧九龍入口的大型廣告位外，更在港、九、新界沿線港鐵站買下約200塊廣告牌。而平時以私家車代步的林峯昨日出巡，快閃殺入旺角、金鐘及中環港鐵站巡視，期間更一度引來近百途人圍觀，場面墟冚！
喪跟被圍逼爆車廂
昨日約下午四時，乘搭保母車的林峯抵達人多擠迫的旺角，其後步行至港鐵站，惹來途人「峯」狂喪跟。難得見到林峯由天王變平民齊齊逼港鐵，途人都紛紛舉機狂拍。林峯掏錢買車票時，一度忘記拿零錢更笑言：「乜依家啲飛厚咗咁多！」到入閘時，久未搭港鐵的他搞笑地不知道新款單程票亦可以嘟卡，還以為沿用舊式插卡款，經提點後才嘟卡成功，場面搞笑！
他於月台等車期間，引來近百途人圍觀兼狂影。粉絲們更跟實林峯乘車往金鐘，令整卡車廂逼爆之餘，林峯更全程被「壁咚」黐埋車角。乘車期間林峯又化身「有求必應黃大仙」，擺出Chok樣和Cute樣不停與粉絲自拍和傾偈，十分親民。貪玩的他更拿起工作人員相機反拍粉絲，又細心地提醒大家不要只顧影相，要緊握扶手以免跌倒。其後他乘車到中環，出閘時又再次化身「大鄉里」，猶豫一會不知應嘟卡還是插卡，引人發笑。
港島區最容易捕獲
受訪時林峯直言以前返學、放學會搭港鐵，但對上一次搭港鐵已是起碼5年前的事，他自嘲今次是「大鄉里出城」：「唔知新地鐵（港鐵）飛原來可以嘟，仲以為點解冇位入！同埋發覺通風系統好咗，亦多咗好多嘢食舖頭。今次同fans近距離接觸好開心同突然，不過我會留更多近距離接觸畀演唱會入場嘅朋友。（好似頭先咁近？）可能會近好多，買飛入場仲唔近啲？」對於他在短短約45分鐘內反轉旺角、金鐘及中環，更被多人圍觀，他坦言冇被嚇窒：「大家都守秩序。（以後搭多啲港鐵？）不嬲想搭多啲公共交通工具，只係工作安排唔方便，其實自己都鍾意周圍行街，都會行街市，好多街坊都見到我。（邊度可以野生捕獲你？）港島區比較多出現，九龍唔多熟路。（下次再搞快閃？）都幾好，自己都鍾意生活化嘅嘢，唔淨係銀幕上先可以見到，可以當街坊咁樣。」他亦表示個唱剛開始接受信用卡優先訂票：「情況聽講都賣得唔錯，多謝大家支持，希望嚟緊可以多啲見大家。」
文：音樂組
攝：劉斌、林定兒