阿倫眼鏡起霧 最驚激凸
譚詠麟（阿倫）前晚以環球大家長出席歌手李幸倪（Gin Lee）加盟環球記者會，穿上樽領衫襯冷外套的阿倫熱到滿頭大汗，更化身「新人王」吳業坤眼鏡起霧氣，抵死的他笑稱「睇吓有冇激凸先」！
去年參加內地兩個唱歌節目而廣為人熟悉的李幸倪（Gin Lee）原來於2014年底已轉投環球唱片懷抱，前晚才舉行簽約記者會，Gin Lee雙親專程來港撐愛女，亦吸引不少音樂人如Eric Kwok及電台主持人捧場，一身黑Look露白滑美腿的Gin Lee即場大展歌喉，先後唱出三首歌曲，同時溫拿、陳慧嫻、劉美君、李克勤、陳慧琳、陳奕迅、張學友及參加內地歌唱比賽的導師周杰倫拍片祝賀。
避談Mr.續約問題
自封是「環球大家長」的阿倫以神秘嘉賓出現，以樽領衫加冷衫的阿倫上台頒金牌給Gin Lee時，眼鏡突然起霧氣，抵死的阿倫即開吳業坤玩笑：「點解起霧嘅？愈嚟愈朦，我冇攞獎，睇吓有冇激凸先？冇着格仔褲（當日吳業坤是穿間條褲）添。」引得全場捧腹大笑，Gin Lee則不停傻笑。對於一手提攜的樂隊Mr.與環球傳不快，阿倫避談說：「今（前）日唔好講呢啲嘢，任何嘢都會令藝人同公司受損，我有帶佢哋做嘢，唔係大家諗咁淒涼。」
師姐Kary未有祝賀
對於有傳師姐吳雨霏不滿她加盟環球，Gin Lee否認說：「唔係，啱啱加入大家庭。（即有是非？）一班師兄、師姐都好支持我，佢好似放梗假。」由於Kary未有拍片祝賀，令不和傳聞更似層層，Gin Lee一臉無奈說：「VCR唔係我安排，我哋冇嘢，之後都有合作過，冇咁嘅事。」而環球發言人表示Kary不在港才未有拍片恭賀。另外，香港環球唱片董事總經理黃劍濤再次重申與Mr.沒有不快，只是傾續約時因條款問題各有己見，亦承認曾找阿倫幫手，更為Kary否認不滿Gin Lee加盟環球。
文：音樂組