阿Sa收神秘男99玫瑰洩蜜

組合Twins的魅力何止吸引陪伴成長的80、90後，前晚最後一場演唱會獲不少圈中人如容祖兒、李克勤與太太盧淑儀、林峯與女友吳千語、周麗淇、黃偉文、英皇集團老闆楊受成夫婦與經理人霍汶希（Mani）等捧場，而關智斌（Kenny）、鄭希怡、洪卓立與女友湯怡、泳兒更坐頭排揮舞螢光棒打氣。Twins甫開場即連場勁歌熱舞，期間演唱《愛情當入樽》時，鍾欣潼（阿嬌）被舞蹈員捧起做倒轉動作時疑似跣手，幸好她未有頭着地，只是撞甩帽，有驚無險。

「龍虎豹」重聚鬥喊

論全晚最「搶鏡」，非坐於VIP席、年約40出頭的男子莫屬。這位「西裝男」一直坐在楊受成身旁，兩人有傾有講，期間跑到台邊向阿Sa送上99支火紅玫瑰，見阿Sa笑晒收花，即時全場起哄！身旁的阿嬌拍掌替拍檔高興，而繼續演唱的阿Sa未有隨手交予工作人員，反而隆而重之將玫瑰交給坐前排的Kenny保管。Encore時，阿Sa感性地向台下歌迷說：「希望有一日有人問你哋偶像係邊個？你哋可以好Proud of咁講係Twins！」

阿Sa尾場特別跳得起勁，有男性朋友捧場係唔同啲！	阿嬌以Bra Top性感上陣，事業線若隱若現。	神秘男全程傍實英皇老闆楊受成睇騷，地位超然。

另一亮點則是天后姊妹祖兒上台，全晚High爆的她企足全場欣賞兼跟住唱，當Twins唱出《下一站天后》時，祖兒更不停拭淚！點唱環節，Twins請祖兒上台令「龍虎豹」再合體，阿Sa見祖兒情緒高漲又面紅紅便笑問：「你係咪飲咗酒？」祖兒說：「我冇飲！我想講要代表全場多謝你哋，將我哋全場拉番去16歲，有一刻我係不停喊，我哋算係一齊經歷順境逆境，見到咁多人錫你哋好開心。」說畢祖兒再度爆喊，搞到阿嬌都眼濕濕，阿Sa再笑祖兒：「你一定飲醉酒，我Feel到！」

慶功宴上，神秘男獲安排坐VIP位！	阿Sa與阿嬌唱至尾場，拖手合唱又感觸相擁。	放大圖片

其後，祖兒提議合唱《你講你愛我》，又捉Kenny上台幫手用手機「網上直播」。祖兒台上暴走又扭籮跳舞，當跟着唱《眼紅紅》到歌詞「然而我愈說愈激動」時，祖兒揸緊拳頭跪地演唱，阿Sa也不禁笑她：「你真係好激動喎！」三人唱畢再擺出「龍虎豹」的Ending甫士，祖兒笑說：「我可唔可以降番落台有氣派啲呀。」但阿Sa、阿嬌與Kenny未有理疑「飲大咗」的祖兒要求而扶她落台，最後Twins唱出《女校男生》作結。

「享受現時生活」

慶功宴上，阿Sa被追問「送花男」是誰？她甜笑說：「Fans嚟(o架)！（Fans但坐楊生隔籬？識唔識佢？）我識好多人(o架)。」講到是阿Sa上前收花，阿嬌在旁幫口解圍：「我懶得滯之嘛！冇理由一紮花兩個人走埋去攞。」提到頭場阿Sa所說「舊嘅唔去新嘅唔嚟」，但她強調仍是單身：「依家幾好呀！事業為重，暫時係單身，幾享受現時生活。」不過，「送花男」亦有現身慶功宴，先後與楊生、Sa媽及Mani傾偈，最後更由Mani送他離開。問到「送花男」是誰？Mani聲稱是楊生從美國回來的朋友，因為是Fans才往捧場，叫大家不用太敏感。昨日，阿Sa上載與母親出發旅行的合照，並留言：「休假幾天，帶媽媽去玩。」

文：音樂組