婷婷爆老父失蹤 送平安鐘傍身

昨清晨時分，有網友在微博上載張栢芝帶着兩子Lucas和Quintus跟謝賢在酒店high tea的照片，相中謝賢戴着黑超，攬着兩孫，栢芝則為三人拍照，非常溫馨。記者致電謝賢，他表示只是日前飲茶時偶遇乖孫：「飲緊茶突然撞到。（栢芝專登帶囝囝見你？）我話突然撞到就突然撞到啦！好開心同驚喜！（大家現況幾好？）大家OK！」他說跟兩孫經常見面，過兩天又會再見面，表示沒有太大節日觀念，（聖誕）禮物到時再算。不少網友留言讚栢芝胖了，教得Lucas和Quintus有教養，另又讚兩子側面已見是靚仔一名。

冇錢交電話費

另外，前晚謝婷婷以黑色開衩大露背裙子出席活動，剛從倫敦返港的她，透露聖誕將留港與家人度過，並爆出謝賢「失蹤」事件，她笑說：「今日（前日）打畀爹哋，佢屋企電話唔通，搵人去拍門，佢話冇錢交電話費。（佢一個人住擔唔擔心佢？）會呀！佢仲有習慣飛線返屋企，但又唔記得飛番出黎，（佢女友Coco呢？）Coco都唔係成日喺香港，（佢哋係咪仲一齊？）我好少問，但據我所知係一齊，佢哋都十年嘞！我爸爸係一個好長情嘅男人！」記者笑言會否建議給父親在家安裝平安鐘？婷婷笑言是非常好的主意，但一定要整到好靚：「佢鍾意皮，可以用皮整平安鐘，當聖誕禮物送畀佢，（佢唔認老？）我哋冇講佢老，所以唔知佢係咪唔認，不過我同佢去睇戲，佢會叫我幫佢買老人飛。」

謝賢左擁右抱兩孫，栢芝則為他們拍照，場面溫馨。	謝賢	婷婷指父親一度「失蹤」，笑言要送他平安鐘。

享受單身生活

提到早前父親和藝人曾江的爭執，近日曾江公開道歉一事，她續說：「大家夾埋都幾多歲呀？我Daddy下年都80歲，都應該要化，咁咪好囉！」父母及哥哥均一雙一對，但她則很享受現時單身生活，對於早前被指有新歡，她解釋與對方沒有發展可能，並替對方搵女朋友，笑言自己跟一對姪兒可湊成一對。而被婷婷爆沒錢交電話費一事，謝賢表示只是電話不通，已跟女兒聯絡。

文：名人組