Eunice遇不速之嚇淫穢粗口樣樣齊

組合Super Girls師妹陳詩欣（Eunice），憑青春活力引來不少宅男成為裙下之臣，奈何加入樂壇後卻變成異性絕緣體。Eunice笑言：「係識多咗新朋友，不過冇追求者。（公司唔畀拍拖？）咁又冇，反而叫我帶眼識人。」問到遇到心儀對象會否發展？Eunice說：「唔會喇，工作為先，專注一樣嘢好難分心。」隨即驚爆原來近月慘受電話騷擾。

拒接沒顯示來電

Eunice表示對方刻意拒絕來電顯示：「我一喂，佢就講鹹濕嘢同粗口，明顯係性騷擾，我即刻Cut線，之後連續幾日係咁打嚟。（識對方？）唔識，相信佢未必知我係邊個，純粹亂撞見有女仔聲咪係咁講囉。」備受困擾的Eunice決定不再接聽沒來電電話：「可能見我冇聽，之後又冇再打嚟。依家電話安裝咗拒沒顯示來電功能，應該唔會再有類似事件。」

自言是屋村妹的Eunice憑甜美笑容，成功俘虜萬千宅男。

Eunice面對惡作劇毫不畏懼，積極尋求解決辦法。

無懼情史被起底

問到有否懷疑是歌迷的惡作劇？Eunice說：「可能性好低，做得我歌迷好乖，從來唔會追車，平時合照都好有禮貌。」現時的新人均有一定家底，Eunice卻自嘲是屋村妹一名：「身家清白，正常家庭環境成長。（有心理準備被起底？）唔驚，舊時拍拖都冇做過啲乜，合照一定有，但一定冇大家想睇嘅嘢。」

文：音樂組　　

攝：嚴偉國

髮型：Vince Yu@IL Colpo　　

服裝：Zalora