朱慧敏搵銀至上聖誕唔寂寞
臨近聖誕節，回復單身的藝人朱慧敏（Queenie）百忙之中抽空欣賞聖誕裝飾，最愛有卡通人物的布置，率先感受節日氣氛。雖然冇拖拍，但她今個聖誕不怕孤單，與工作「拍拖」度佳節亦樂在其中。
Queenie兒時最喜歡卡通人物擺設，童心未泯的她在布滿卡通公仔的購物商場，捉實卡通人物逐個影。她說：「細細個好鍾意睇Looney Tunes（樂一通）呢套卡通片，因為情節好搞笑，又會講友情部分，帶畀我好多歡樂同正能量。特別記得佢以前有出薯片附送卡通人物嘅貼紙，我為咗儲齊一套貼紙而狂食薯片，後來食唔晒啲薯片仲要帶返學校分畀同學食。」
約朋友開派對
回復單身的Queenie今個聖誕節不愁寂寞，工作一浪接一接，與工作共度佳節：「其實我由細到大都會去尖東睇燈飾，不過今年聖誕我會忙到不得了，工作方面會做好多聖誕騷同倒數活動，但都開心嘅，因為有得做嘢搵真銀，又可以同觀眾朋友一齊過聖誕，一大班人過節特別有氣氛。我到時仲會抽時間，約唔同朋友聚會開party，所以今個聖誕節會過得好忙碌但亦好充實。」
想要幽默男
問有否追求者約過聖誕節？Queenie笑言：「我有好多人約我過聖誕，但係咪追求者我就唔知，有男亦有女約我o架！（咁之前個位音樂人朋友呢？）其實大家誤會咗，我係識咗一位新嘅音樂人朋友，但佢唔係追求者或者拍拖對象，只係一位普通朋友。」雖然感情方面未有着落，但Queenie並不着急，更寄望下一個對象是個幽默的人：「希望我另一半係個開心、充滿正能量嘅人，就好似我鍾意嘅Bugs Bunny（賓尼兔）咁，幽默風趣，同時可以保護到另一半，令我覺得被愛，亦都帶畀我安全感！」
文：專案組
場地：Citywalk荃新天地