田蕊妮 胡定欣最想再封雙視后
田蕊妮與胡定欣以馬國雙視后身份挑戰無綫視后寶座，由戰友變成敵人，兩人曾揚言互不相讓，阿田認為獎項乃工作換來的成果，絕對不會嫌多，但也大讚定欣表現不俗。定欣則坦言與無綫視后還有一段距離，如今能成為大熱已感滿足，更睇好阿田及汪明荃封后成數高。
已是視后級的田蕊妮，早前憑與胡定欣於劇集《鬼同你OT》中「神同步」的精彩演出，破天荒於上月尾在《TVB馬來西亞星光薈萃頒獎典禮》雙雙摘下視后獎，兩人同時入圍本月13日舉行的《萬千星輝頒獎典禮2015》候選視后，相信今次評審們會(抓)爆頭。
阿田唔肯讓獎
年前已憑《巨輪》一嘗視后滋味的阿田，演技早已被肯定，今回於《鬼》劇碰上定欣擦出火花，效果獲一致讚賞。對於定欣的表現，阿田大讚：「佢啲戲不嬲都OK，今次第一次合作，估唔到又咁合拍，印象最深係大家認為『神同步』嗰幾場戲，初頭排嗰時真係未得，幾大壓力，估唔到正式又好快搞掂。（咁邊個好啲？）嘩！我唔識畀分，總之係拍得好開心。」
談到無綫視后只得一個，阿田不諱言想攞獎：「獎項係代表大家認定咗你，邊會嫌多架！對自己梗係要有信心。（讓定欣？）又唔得，相信評審都公平嘅（又兩個一齊拎？）都OK喎，皆大歡喜。」
定欣認有距離
定欣則笑指因為剛在馬來西亞封雙視后，令無綫視后花落誰家增添刺激感，自覺對該獎項仍需努力。她謂：「我睇好汪明荃同阿田，對自己係有信心，但都需要努力先拎到。（之前阿田話爭贏咗視后個心會唔舒服，如果你贏會唔會唔舒服？）當然會，不過人哋話我係大熱已經好開心，贏唔贏已冇所謂，平常心。今次係第二次提名視后，已經打咗強心針。」雖然已有一個視后獎在手，但定欣指汪明荃及阿田均是視后級演出，自己還有一段距離，尚有改善空間。問到若然獲獎最想多謝誰？定欣謂：「梗係阿田，佢同我喺套劇冇法分離，最好就一齊拎。」
文：影視組