伍家謙瓣數多樂在忙中
所謂樹大好遮蔭，不少人都希望留在大公司發展，但總有人願意跳出去找尋新方向。前無綫體育新聞主播伍家謙就是一個跳出框框的好例子。自由身的他除在網台主持體育節目外，又為本地足球隊任宣傳大使，最近又與「天梭表」合作，再加上其他專欄及電影工作，隨時比以前更忙，但他卻樂在其中。
最近與「天梭表」合作的伍家謙脫去從前在做主播的一本正經，換來一份輕鬆自在感。在無綫電視新聞部工作了十一年，到底甚麼原因令他離開？他說：「因為覺得啱時候，始終同一個機構做耐咗，想轉去第二個地方呢種心態我相信係人都會有。我認為人生應該係一個幾好玩嘅過程，唔應該只係做一個機構。同埋點解嗰時候會適合呢，因為嗰時啱啱結婚冇耐，我覺得可能第時有小朋友，或者屋企有其他負擔嘅時候，就好難會突然間轉職，咁我就真係可能一世都要做同一件事，我唔係太想，我想試多啲新嘅嘢。而且雖然我離開咗呢個機構，但係我冇離開呢一行，我依然希望可以繼續做體育傳媒嘅工作。」
「Never Say Never」
從事體育傳媒工作十多年的他，當初因緣際會接觸體育界，至今亦離不開這個組別，他坦言有義務將香港運動員的故事呈現在觀眾眼前。他說：「其實好得意，因為我自己讀書嗰幾年個經濟環境好差，咁我想早啲入行，咁啱有個師兄話佢哋體育版有一個空缺，咁我覺得可以試吓。慢慢喺工作過程中體會到好多，見到好多behind the scenes嘅嘢，覺得香港運動員好多辛酸嘅嘢應該值得畀大家去知道。我作為傳媒工作者，就覺得我有責任，將佢哋嘅故事呈現喺觀眾面前，咁慢慢培育咗一份使命感，再慢慢覺得離唔開呢個行業。」
問伍家謙會否重回無綫？或倣效前輩方東昇主持旅遊節目？他說：「我記得伍晃榮先生曾經講過一句說話，呢句說話亦係源自我偶像Michael Jordan，Never Say Never！永遠唔好講永遠唔會，或者永遠一定會。未來嘅嘢冇人估計得到，以前嘅工作好開心，我依家嘅工作亦都好開心。」
文：張雯雯
攝：鄭家俊