陳慧琳愛老公body唔使操fit
一向形象健康的陳慧琳以性感透視裙現身蘭桂坊，對於之前她拍的MV中有名三猛男裸露上身，她表示雖欣賞健碩型男士，但已放棄要老公操fit，還賣口乖說：「佢個胴體我都好欣賞。」
歌手陳慧琳（Kelly）前晚穿上透視裙以嘉賓身份出席蘭桂坊加州大廈開幕，同場有狄易達表演跳舞、李璧琦唱歌劇，還有甄澤權表演魔術將「蘭桂坊之父」盛智文變出場。Kelly提到她之前拍攝的MV十分性感，笑謂MV在夜場拍要性感作配合，她說：「我都好耐冇蒲，入行後只係蒲過幾次，結婚後係零，個人好out，發晒霉，覺得自己錯過好多嘢。老公in過我，但唔係最in。（老公有否介意MV中同三個裸上身猛男一齊？）我喺MV入面都冇做啲乜嘢，只係三個人唔着衫喺我隔籬，係有少少尷尬，唔敢直視佢哋嘅胴體。」Kelly又謂鍾意健碩身形的男士：「好難練，我欣賞。（叫老公練？）放棄咗，佢依家個胴體我都好欣賞。」另外，談到TSA（全港系統性評估），Kelly戥小朋友慘，直言贊成廢除，小朋友為溫書考試測驗錯失玩的機會，沒有創作空間：「創作唔係喺書本上學，要出去玩先有靈感，成日對住本書我都幫唔到佢。」
楊洛婷險為影相離婚
而楊洛婷為大會擔任司儀，提到她早前與老公兼樂隊Dear Jane主音Tim到馬爾代夫度蜜月，她自言未有好消息（生仔）：「有當然開心，冇就過住二人世界先，老公好enjoy我依家咁fit嘅身材。」她又指在馬爾代夫的比堅尼靚相背後其實有付出，她笑言：「我甚至有幾秒諗過要同佢離婚，你知啦，女仔對泳衣相要求好高，又要影得腿長又要腰瘦，每張相差唔多影咗50張相先得，影到我唔想影，當地有個保安幫我影相係一take過搞掂，我同Tim講，你部相機幾萬蚊都冇用啦，係影相手法嘅問題，原來個保安之前喺當地影咗18年嘅目錄。」
文：名人組