祥嫂與仔女攤牌 關係畫問號
已故慈善伶王新馬師曾遺孀洪金梅（祥嫂）與子女再鬧紛爭，她昨日發放五段聲帶作淚的控訴，但態度明顯軟化，奉勸兒女「以和為貴」及「易地而處」外，又自爆當年曾墮胎兼一度拉嗜賭的祥哥跳樓！所謂「血濃於水」，祥嫂希望紛爭告一段落，宣布與「鄧家」畫上「問號」。
最近與四名子女兆尊、兆榮、小艾及碧玉再掀紛爭的「祥嫂」洪金梅，昨日透過黃夏蕙前經理人Simon發放五條聲帶，以及兆尊等人要求她所簽的法律文件。Simon補充今次祥嫂再跟子女不和，因有人拒繳交二千萬遺產稅。
五條聲帶中，祥嫂哭訴爭產事件纏擾18年，態度明顯比早前軟化，自責當年沒好好照顧兒女，導致長大後不受教：「呢啲都冇得怨，今日我71歲高齡，坦白講都嗰頭近，仲何必爭一日之長短，尤其同自己所出嘅。我都有不足之處，顧得掂老公嚟又疏忽咗子女，希望社會人士唔好對我啲兒女有成見或歧視，佢哋入世未深、良莠不齊。」
祥嫂坦言現已心交力瘁，奉勸兒女「以和為貴」及「易地而處」：「最緊要調得番轉呀紅衞兵！我唔介意喎！你點糟質我仍以祥嫂為榮，我頂得順o架！如果當日唔係下下顧住你老竇我老公，畀人顧咗咁點呢？第五、六任『祥嫂』上嚟就冇你哋存在，點解你哋唔體諒我呢？」為了保護子女，祥嫂坦言會向老公表達要求，問到太保護仔女令他們如此反叛？她激動地說：「咁反叛你做我老母囉！」
輸清戶口200萬？「差唔幾囉」
對於嗜賭的祥哥座右銘「搵得嚟輸得去」，祥嫂直言反感，還自爆當年曾墮胎又拉老公跳樓：「我喺永祥大廈同佢大解決，有年佢個妹帶我去落仔，我下身痛到唔可以出街，祥哥就去傾偈、吹水，見到咁耐唔返，問司機佢話祥哥話唔可以講。」其後，祥嫂致電各處俱樂部找祥哥，對方回家後只寫了張支票，向祥嫂說「對唔住」並叫她「搞掂」，問到是否大數目？自爆當年戶口合共僅存200萬的祥嫂說：「梗係大數目！呢200萬唔係畀祥哥賭，係用嚟買物業、買地。」她又指當年母親患有多種病，該現金是預留作醫藥費。問到是否輸清戶口的200萬？祥嫂慨嘆：「都差唔幾囉！（好嬲？）佢真係對我唔住，連兒女啲教育金都輸埋，你都唔係輸埋我啲私己錢o架。」
祥嫂回憶未嫁前，祥哥仍未名利雙收，仍租住別人車房，其後擔當「幕後英雄」打點一切，兩夫妻同甘共苦：「我哋係咁捱出嚟，唔係新馬仔臨死咁大把家財、物業！佢啲工作都係我安排，當年你紅衞兵冇幫到我手。」
「佢哋係壞但唔係毒」
最後，祥嫂宣布回復自由身，與鄧永祥（祥哥）家人畫上問號，又稱不再回應有關鄧家的事。問到是否捨不得畫上句號？她說：「終歸切肉不離皮，希望有生之年可以扶持佢哋一把，佢哋係壞係曳，但唔係毒瘡，點可以割？」語畢，祥嫂爆喊稱與洪家也要畫上問號，又寄語子女要自愛、自立、自我檢討：「你四個搞我一個，夾埋我洪家姊妹為乜？做乜咁嬲怒我？」對此，鄧小艾透過電話只說：「唔想再答。（相關行動？）乜都唔會做。」鄧兆尊至截稿前仍未有回覆。
文：影視組