關淑怡爆甩拖「邊個係我男友？」

歌手關淑怡（Shirley）、顧芮寧（Elaine）、二胡王子王憓與音樂會創作總監及監製Bolie Wong昨日出席《感覺．國樂》中西薈萃音樂國度音樂會的發布會，該音樂會將於12月27日假香港文化中心舉行，席上王憓除了即場演奏一曲，還特別準備二胡與字畫，分別送給Shirley跟Elaine。Shirley透露上一次開騷已是年多前，今次首度跟中樂團合作感有趣，並會將所有歌曲重新改編，令觀眾耳目一新。談到中西合作可有難度？Shirley指現階段仍未開始綵排：「有啲嘢排咗先知，應該都OK！」

續與經理人合作

當問到男友屆時可會來撐場，Shirley即睩大雙眼兼搖頭說：「邊個係我男友？（上次你拖住嗰個？）冇話過佢係喎！朋友嚟o架！（咁囝囝嚟唔嚟睇？）我做嘢還做嘢，工作還工作。」至於早前她在社交網站怒斥工作上遭不公平對待一事，Shirley表示已經沒事，問到可有繼續跟經理人Marianne（王敏慧）合作時，她承認仍然繼續跟對方合作，兩人亦已認識多年。

關淑怡、顧芮寧與監製Bolie Wong等出席記者會宣布開騷，並大合照留念。	顧芮寧獲關淑怡激讚有才華，期待今次合作。	關淑怡早前與李佳念經常出雙入對，但原來情已逝。

退出樂壇：未知！

另外，記者問到早前曾傳出自殺與退出娛樂圈、經歷喪母的Shirley曾揚言要返美國，她只說：「私人嘢，係兩件事，同工作冇關。（返美國定居？）私人嘢，太私人喇！（有咁嘅打算？）唔講。（想退出樂壇？）未知，唔知呢？將來嘅嘢冇人知。（對於媽咪嘅離逝，心情好番啲？）冇乜嘢心情唔好，好私人嘅嘢！」Shirley讚Elaine有才華，而且兩人私底下早已認識，所以特別期待今次的合作。

文：音樂組