Twins泳衣上陣唔見得光

組合Twins除了忙於排練12月31日起假紅館舉行五場《Twins LOL Live In Hong Kong》跨年演唱會外，還忙於籌備今日推出的新專輯《LOL》。今次兩人大玩新意思，把專輯分拆成兩張EP，一張展現兩人歡樂正能量，另一張則流露兩人感性的成長閱歷。兩人日前為新唱片拍攝封套，除了穿上性感泳衣裝展現弗爆身材外，又要首次挑戰在全黑環境下拍攝！

阿Sa露腰晒腿

蔡卓妍（阿Sa）與鍾欣潼（阿嬌）相隔三年再合體拍攝唱片封套，為配合「讓聲音看得見」的造型概念，穿上寓意五線譜、設計以線條為主的裝束，內裏則以泳衣打底，大晒美腿之餘，阿Sa更騷小蠻腰，身材弗到漏油！為以最佳狀態拍攝，阿Sa不但Keep住做體能訓練，連周末亦特意早起做運動特訓，阿嬌則勤做Spa及美容療程。今次封套大玩動感與光影效果，兩人需於一片漆黑的環境下拍攝，搞到攝影師要不時問兩人的位置，還試過當快門聲響起時，Twins無故自爆：「我合埋咗眼添！」場面搞笑。事後，阿Sa與阿嬌笑言拍攝相當過癮：「喺鏡頭前嘻嘻哈哈、行來行去，好似飲醉酒咁，好搞笑！」有口痕的工作人員即說：「一熄燈人就消失咗，覺得你哋兩個唔見得光！」

Twins大玩光影效果，滿意封套效果。

放大圖片

阿嬌負傷開工

Twins對於今次拍攝，最大考驗並非一身泳衣裝束，反而是一對不合尺碼的高跟鞋，因為阿嬌於拍攝前兩日不慎扭傷腳，故當做踢腿與彈跳等動作時，因腳部肌肉不夠力而搞到飛甩鞋，阿Sa踢爆對方論盡：「佢行路成日左腳撞右腳，好唔小心！」雖然拍攝過程艱辛，但效果很好，兩人十分滿意。

文：音樂組