湯唯西片蝕4億：盡咗力！

女星湯唯憑李安執導的電影《色，戒》揚威海外，早前更打入荷里活夥拍「雷神」基斯漢斯禾夫（Chris Hemsworth）和王力宏合作電影《黑客特攻》（Blackhat）。《福布斯》昨公布本年度15大全球票房最仆直電影，《黑》片竟排第三。

無緣內地上映

據知，由於《黑》題材敏感，當時無緣在內地上映，電影投資約7,000萬美元（約5.4億港元），但最終全球票房僅收1,940萬美元（約1.5億港元），勁蝕5,060萬美元（約4億港元）。

湯唯昨晚穿長裙Fit爆現身香港，出席商場聖誕亮燈儀式活動，對於《黑》成績差，她謂：「係咩？呢套電影拍攝時好開心，學到好多嘢，個腦好似未停過去吸收。」問會否怕影響日後接拍西片的機會？她稱：「自己接劇本會視乎能唔能夠打動到自己、同有冇心跳感覺，可以表達到啲嘢先接。身為演員盡咗力，觀眾鍾唔鍾意係每個人嘅選擇。（與內地未有上映有關？）咁又要上映咗先知，依家啲觀眾好成熟。」問知否勁蝕的原因？她說：「唔覺得係輸，導演米高曼都想試好多新嘢，我同佢好好朋友，好支持佢。」

忘記老公生日

再問湯唯會否飛到韓國為丈夫金泰勇慶祝12月9日的生日兼過聖誕？她一臉愕然似忘了丈夫生日：「自己生日有時都未必記得，順其自然啦。見到面日日都係生日、聖誕。（生育計劃？）順其自然。」她又想再與丈夫合作電影，但對方一直拒絕。

文：影視組