苦主陳達仁寸爆：突然行善喎！

盧頌之（DaDa）因醉駕撞毁了電台DJ陳達仁借出的座駕，還令同車的他右手臂骨折，其後因賠償問題而反目。對於DaDa派飯博洗底，陳達仁寸爆對方：「幾好呀！但點解佢未發生撞車事件前唔去派飯？佢呢個行為，記得用『突然行善』嚟標題喎！我先係最切膚嘅苦主，派（飯）都派畀我先啦！佢做訪問都唔提我個名，連帶挈吓我見報落張『車頭相』都冇。」談及DaDa男友King曾揚言肯為女友付賠償，陳達仁指未收過賠償，亦冇人接觸他：「有記者問梗係老虎蟹都話肯孭起！」他透露原屬車主的陳達仁胞弟已到政府公函要求賠償14,000元修電燈柱費，問到由誰負責？陳達仁指先嘗試Claim車保，但相信獲賠償機會微，或最終由他找數。