醉駕DaDa起義派飯博洗底

今年７月，DaDa與DJ陳達仁及另一友人消遣後，她在酒精影響下冒險駕駛，最後發生交通意外，陳達仁骨折受傷，未有受傷的DaDa因醉駕被捕。事發後，備受千夫所指的她一度躲在家中避世，還因事件跟健身教練男友趙勁皓（King）吵架一場，她說：「King有鬧我，但係自己真係做錯咗，其實佢畀咗好大支持我，因為呢件事太嚴重，身邊所有人都鬧過我。（好後悔？）都發生咗，惟有再做好啲！啱啱出事之後，自己匿埋喺屋企，朋友見我咁咪話不如出嚟做吓義工，做番啲正能量嘅嘢，到依家為止已經參加咗好多義工活動。」

周五履社服令

隨着好友帶領下，DaDa投入義工行列，最希望幫助弱勢社群，曾參與教傷健人士打籃球及訪校跟小學生交流等，日前便隨惜食堂當義工，為一班老人家派發飯菜。起初，DaDa自言廚藝不俗而自薦做廚師，但因名額有限而落空，今次先由最簡單的傳菜工作做起，全程有板有眼未見雞手鴨腳，她說：「見到老人家食得好開心，都好欣慰。」她又讚機構有愛心：「好溫馨！兩餸一飯都唔錯，唔夠又可以添飯！佢哋收集一啲街市賣剩嘅菜同肉，然後攞番嚟煮，唔浪費之餘又可畀到啲老人家溫飽。」DaDa坦言今後若時間許可，打算繼續行善幫助別人，因為施比受更有福。

DaDa放下明星身份，為公公婆婆斟茶遞水。	雖然要落手清理廚餘，但DaDa未有迴避，夠晒「義」氣！	放大圖片

提到判罪，DaDa將於今日會見感化官，周五便開始做第一次社會服務令，她說﹕「我會先上堂了解咩係社服令，有咩工作細節等等，但依家未知要做乜，因為感化官唔肯透露，每次要做８小時，預計要做15至16次，自己犯咗錯，做社會服務嚟彌補過錯都好應該。」

男友全力支持

醉駕事件後，King曾揚言全力支持女友DaDa，對於賠償問題，他接受電話訪問時說：「法庭罰嗰三千蚊已經交咗。（賠錢畀陳達仁？）如果佢以正常法律途徑去追而又判我哋要賠，我哋會遵循法庭決定！」提到DaDa今次做義工，似為自己洗底，King說：「佢不嬲都有做義工，冇話為咗洗底先去做！（點支持DaDa渡過難關？）唔提呢件事，等佢過番正常人生活！佢依家生活都ＯＫ，平時做吓Freelance，又有做室內設計，錢方面唔使擔心，我會全力支持佢！」

文：名人組