薛凱琪做自己可愛預告

從前勇往直前，愛無反顧，可是付出多少，並不等於可以接收多少。經歷過數段難忘戀情的Fiona，終於領悟出愛的真諦─愛別人的首要條件，就是先愛自己。

「我拍拖的經驗算唔算豐富？如果次數多代表『豐富』，我就完全唔豐富，一隻手都數得晒，但係如果話拍拖次數裏面嘅經歷豐唔豐富？咁喺我人生裏面嗰幾段戀情，所經歷過嘅事、情節，我覺得足夠啦，令我好疲倦（用普通話加強語氣），可以拍成電視劇呀！其實我都好希望搵到一個我愛嘅人，平平淡淡、好開心咁就得。

「以前我愛一個男仔，我會不顧一切為佢做好多嘢，我覺得咁樣係啱嘅冇問題，但原來去到不顧一切，我開始覺得冇咗自我。好似試過有個男朋友唔鍾意我着短裙，我永遠就着過膝嘅裙，佢有年出國讀書，佢同我講：『我要出國一年唔返嚟，大家都要乖啲，你都唔好同啲朋友出街飲酒。』我就真係冇喎，任何朋友約我出去係飲酒嘅地方，我真係唔會去，點知畀我發覺，原來佢喺外國狂去。

薛凱琪曾經為了愛而不顧一切，可是卻跌得焦頭爛額。	薛凱琪做好準備，決心要做一個可愛的人。	Fiona憑歌寄意，新歌道盡自己對愛的新體會。

做番自己 並非背叛

「依家我嘅愛情觀念，學識咗你要有力量有energy去愛人，首先你要愛咗自己先，我以前只係識得愛人，唔愛自己，原來係唔得嘅，依家嘅我，如果我有伴侶我會好愛佢，只不過我首先要有番我自己，即使我着短裙，或者同朋友飲杯嘢，我唔係背叛你，唔會做啲背叛你嘅行為，亦都冇對唔住你，我覺得我男朋友，應該係一個善解人意嘅人，佢會體諒，我搵到我自己係邊個，咁我嘅男朋友先會知道佢愛緊嘅係個咩人，而唔係千依百順好愛佢嘅女人。」

朋友的一句睿智之言，讓Fiona有若醍醐灌頂。愛一個人，你願意為他付出，也值得為愛犧牲，但有一條底線不能逾越，就是別為追逐一段愛情而失去自己。

「現階段我對愛情有一個新領悟，就好似我首新歌《那一個我》，首歌係講每個人都想其他人去愛自己，無論朋友、男朋友，或者你心儀對象，曾經聽到一個朋友講一句說話，令我有所領悟，佢話：『你要人去愛你？其實你唔好要求人去愛你，你要先做咗一個可愛嘅人先！』佢所指嘅可愛唔係『cutie』嗰個『可愛』，係值得人可以去愛嘅人先。我覺得佢講得好啱，做人唔好成日期望人哋畀好多嘢你，你自己要付出咗先，當你自己可愛時，即可以畀人去愛，識得去錫自己多啲，搵到自己，人哋自然會愛你。

那一個我 做得更好

「最初聽到呢首Demo嘅音樂，我就好有感覺，隨即寫咗幾百字畀填詞人，將我想寫嘅感覺寫出來，當收到份詞時，我覺得份詞寫得好好，有少少日本民謠感覺，感覺好有光芒、好有hopeful（希望），歌詞其中一句寫『任那一個遠離我，才令這一個接受到這一個我』，以前所過去嘅人，佢離開我嘅生命有佢嘅原因，可能係要令我學識再做一個更好嘅自己，就算當時可能係所謂嘅不歡而散，我都係學到啲嘢，我希望不斷去學習做一個可愛嘅自己，可以畀人愛嘅自己。」

曾經滄海，過去那些曾讓Fiona受傷的戀情，也非一無是處，當累積起更豐富的經歷，更充足的智慧，才能使自己放開胸襟迎接真愛，懂得愛人、愛己。

「如果你問我過去嘅戀情有冇受傷過？梗係有啦，所以依家喺我可以控制嘅範圍內，盡量我啲歌都係正面嘅，因為每個人都有底蘊，其實我個底係負面嘅，所以我不斷去做好多呢類歌，去提醒自己，身為基督徒嘅我同自己講：『神係應承咗畀最好嘅你，你唔好驚，即使遇到一個呃你嘅男仔，一定有佢原因，可能係要你經歷某一啲嘢，你先會懂得珍惜，珍惜未來嘅老公，更加識得揀男仔。』可能我以前揀嗰啲全部都係錯嘅，我自己都要負上一啲責任。」

口述：薛凱琪

文：May

攝：張福宏

Hair：Jo @ Salon Queens Private I

Makeup：FrancesHo @ jessicachan makeup workshop

服裝：pink top：Naco Paris @ nacoparis、boots：IKKII @ ikkiiboots @ 10thshop