袁立勳輕騎北上巡演
從政府退下火線的袁立勳重拾導演筒，執導麥長青、江美儀等人參演的舞台劇《羅生門》，袁導今次刻意打造「輕騎式」劇組，方便將整部舞台劇衝出香港「北移」，計劃殺入上海及北京等地公演。
擁有戲劇碩士學位的袁立勳自小沉醉於舞台劇，曾是香港青年文學獎「最佳劇本獎」三連霸，其後毅然踏入政府擔任公務員，最近正式退休。
與李居明雙劍合璧
今次袁導為《羅生門》再執導演筒，因巧遇有份籌備《羅》劇的李居明大師，他說：「我卅年前喺香港話劇團時，李師傅已經有參與演出，到最近見面講起，佢就話不如出返嚟做舞台劇，咁就興起再次合作嘅念頭。」
袁導與李大師今次親自欽點三位好戲之人麥長青、江美儀及單立文參演《羅》劇，三人分飾九個角色，袁導說：「改編劇本時，加入咗唔少新元素，原本短篇小說得五、六版紙，所以中間啲對白會唔同，而三個演員唔係孤立，我哋安排咗四位舞蹈員、三位劍士同六位樂師上台演出，將舞台最大效力發揮出嚟。」
舞台佈置虛實結合
為了方便巡演，舞台佈置將會虛實結合，透過燈光、佈景打造另類風格，袁導表示初步計劃將《羅》劇衝出香港，北上巡迴演出：「喺廣州、上海同北京都有接觸過當地劇場，就因為呢個原因，我都想大家『輕騎式』，唔帶太多演員、服裝同佈景，如果唔係巡迴就會好麻煩！」
《羅生門》演出詳情
導演：袁立勳
主演：麥長青、江美儀、單立文
公演日期：2016年1月29-31日（共五場）
公演地點：北角新光戲院大劇場
文：音樂組