龍劍笙加場門票售罄

龍劍笙年底假演藝學院歌劇院演出的《紫釵記》全劇，繼早前十場門票被搶購一空後，主辦單位新娛國際負責人丘亞葵（Vigo）宣布於2016年1月4日至1月9日期間加開六場。門票昨早開售，大批戲迷一大清早已在售票場地外排隊輪候，務求第一時間撲飛，結果開賣後短短十分鐘，高價票旋即售罄，其餘門票亦於約一小時後全數沽清，購得門票的戲迷開心得大叫歡呼，而遲來的觀眾撲不到飛，情急下失望得當場落淚。

決不加演

對於戲迷的狂熱支持，Vigo說：「戲迷嘅熱情已經唔能夠用『感動』兩個字去形容！今朝排隊嘅人龍比第一次公開發售時，更加狂熱同埋人數多，有戲迷買唔到飛，心情失落，但十六場嘅演出係唔會再延長，即使好多刨迷傷心到喺售票場地流連唔肯走，我哋都好無奈。」

答謝戲迷

阿刨昨午與好友鍾楚紅吃飯，獲紅姑送上恭喜，阿刨對門票大賣表示：「多謝上天恩賜，多謝華光師父照顧，多謝任姐保佑，多謝戲迷支持，感激得到廣大觀眾嘅支持愛戴，一定盡全力演出，報答戲迷支持！」

兩位有份演出《紫釵記》的新進演員李沛妍與鄭雅琪亦感興奮，二人均對觀眾熱烈反應覺感動、開心，並多謝阿刨給予她們機會，並會盡力演出答謝觀眾。

文：影視組