莊思敏急彎失控撞散車頭「被困」

一班藝人包括莊思敏（Jacquelin）、苟芸慧、周秀娜、劉浩龍、方力申、曾國祥與余文樂等昨日參加《第62屆澳門格蘭披治大賽車》明星蓮花挑戰賽的排位賽，合共23位賽車手落場鍊車，當中藝人參賽者中以方力申排名第11位為最高，緊隨其後有劉浩龍（第12位）、莊思敏（第13位）、余文樂（第14位）、周秀娜（第17位）、曾國祥（第18位）及排第20位的苟芸慧，將於今日爭奪冠軍車神寶座。

幸好未有着火

勇字行頭、夠狠又有技術的Jacquelin賽車經驗老到，但昨日的排位賽卻不慎炒車，幸好只是車毀，人未有受傷。駕駛8號戰車的她駛至海角遊魂彎時失控撞欄，車頭被撞散，戰車更在路中心擺橫，工作人員隨即出示紅旗。炒車後，Jacquelin未有即時落車，在車內停留了足足5分鐘才爬出來，戰車幸未着火，可謂執番條命！

莊思敏掟急彎時失控撞埋牆，搞到車頭散晒，幸好劉浩龍未有撞上。	莊思敏「被困」五分鐘後自行落車，睇佢個樣唔多滿意表現。	放大圖片

賽後，Jacquelin受訪時為炒車認衰：「因為畀劉浩龍追住，個心一急就想遲啲先收油，結果入彎就失控，最後撞咗埋牆，好似波子機咁撞咗幾吓，搞到後面啲車塞住晒！（撞車一刻勁驚？）又唔係好驚，好彩劉浩龍冇撞埋嚟，個人冇事OK啦！希望聽日成績好啲，因為依家（明星賽）排緊第3位，如無意外架車係整得到嘅，我就可以如期出賽！」炒車後，她急急上載照片報平安，還與戰車合照，為「心肝寶貝」打氣：「8號仔，好好休息，明天精神啲。」及後，心情未有受影響的Jacquelin到餐廳醫肚定驚：「去間米芝蓮餐廳食個飯，定吓驚先。食飽飽返去瞓。」

苟芸慧打完白鴿轉後戰車便「拋錨」，難怪乸口乸面。

一班藝人落場前合照，先禮後兵。

「心情差到極點」

同樣在排位賽炒車還有新手苟芸慧，她昨早在社交網上載多張台慶靚相及數張與99號戰車的Chok爆合照，並留言：「早！準備出車！經過一天2個很不同的角色在香港、澳門2地很趕地來回奔波……希望順利進行。」不過，苟姑娘不久後再次留言，似是發洩不快：「好吧！很不知道自己到底在幹甚麼的情況下，努力維持情緒，直到完成賽事，說真的心情真的差到極點……」原來她在開賽不久，戰車便在漁翁大直路打「白鴿轉」，其後一度重返賽事，惟幾秒後其戰車再度「跪低」，工作人員更出示紅旗，苟姑娘被迫退出賽事，幸好她能夠自行離開車廂，未有受傷。

文：專案組