吳啟華寧搵粉絲冷落女版Bob

51歲藝人吳啟華從影多年拍盡大批索爆花旦，近年更愈拍愈嫩，先後與港姐黃心穎、朱千雪及蔡思貝傳緋聞，難怪被封為「小花殺手」！但最近啟華被迫「轉口味」，為幫監製好友鄧特希拍攝日本及馬來西亞投資的新劇《隱世者們》，與215磅日本諧星「女版Bob」渡邊直美合作，兩人被《好報》拍到在中環翹手扮拍拖，渡邊甜笑冧爆，相反拍慣小花的啟華面對巨無霸似乎「鯨吞唔落」，全程面燶燶，一Cut機即匿入商場，又多番強調與渡邊只是演特務同事，絕冇親熱戲份，擺明要落閘！

鄧特希：佢太入戲

對此鄧特希昨日受訪時解釋啟華對住渡邊黑面只是劇情需要，只因戲內啟華確實唔妥她，可能太入戲，以致予人感覺不滿：「戲入面渡邊係做啟華手下，啟華對呢個下屬冇咩好感，係幾抗拒佢，覺得佢唔係好人，可能啟華太入戲，睇落似黑面啫！事實上套劇啱啱拍，佢兩個只係第一次見面，要時間warm up吓嘅！（啟華一休息就匿入商場避開渡邊？）唔係，因為有幾位忠實粉絲嚟咗探班，佢入商場同佢哋影相啫！」他又指渡邊是一個專業演員，喜感十足兼身手靈活，當晚啟華帶同Fans宴請渡邊吃豐富燒鵝餐，現場有講有笑氣氛融洽。

鄧特希（左）、吳啟華（中） 帶埋粉絲與鄧特希宴請渡邊。	渡邊直美（左）	渡邊直美日前在港品嘗上海美食。

渡邊想拍親嘴戲

啟華則表示新劇剛剛開工，只是第一次見渡邊，之前有看過她參與的綜藝節目，對她絕無嫌棄之餘更大派高帽，盛讚渡邊表情豐富夠得意：「佢好專業，表情豐富，係好好嘅喜劇演員，唔係太誇張，但見到會令人想笑，我上網睇過佢嘅節目，覺得佢有表演天分，幾得意吖！」至於渡邊擺明對啟華嗒糖，讚他充滿魅力，Cool中帶點親切：「我鍾意認真穩重類型，唔鍾意吱吱喳喳嘅男仔，如果可以同佢有更多親密戲仲好，最想係有親嘴戲！」

文：影視組