汪明荃耳水不平衡辭演歌舞

鄭少秋（秋官）和汪明荃拍檔演出的《Sunday靚聲王》播出八個多月以來反應甚佳，又在新加坡舉行的《星和無綫電視大獎2015》獲得「我最愛TVB綜藝節目」和「我最愛TVB綜藝節目主持人」兩個獎項，成績斐然，這對「鎮台璧人」在今年無綫台慶的大日子中，被安排帶領廿四名小生和廿四名花旦共四十八人表演大型歌舞，以慶賀無綫48周年台慶！怎料綵排前汪明荃患上「耳水不平衡」，病徵是經常頭暈，暫不適宜太勞累演出，為免阻礙進度，她只好向無綫辭演，台慶夜只擔任司儀一職。

介紹「黑豆食療」

秋官日前現身排舞室為台慶歌舞首日綵排，他與大批藝人包括陳庭欣、吳若希、呂慧儀、王君馨、姚子羚、李施嬅、陳煒、黃長興、陳山聰和翟威廉等投入練舞，期間，秋官更與本月21日生日的陳煒食蛋糕慶生。當談到汪明荃的病情時，秋官笑言：「佢早前學謝賢、曾江喺《４個小生去旅行》爭執揈水髮，揈到頭暈囉！（係咪做《靚聲王》辛苦？）都係o架！佢今次唔演出歌舞都好可惜。（介紹養生秘方？）有呀，我太太都有頭暈，但食黑豆好咗好多，我咪介紹條秘方畀阿姐囉。」

汪明荃耳水不平衡頭暈，秋官即介紹食療給她。

呂慧儀、秋官同賀陳煒生日。

多休息僅任司儀

汪明荃昨日受訪時承認患有「耳水不平衡」：「係呀，依家休息緊，睇咗醫生，唔想阻住佢哋綵排咪同公司講唔表演，只做司儀。（秋官擔心你？）佢有介紹黑豆畀我，但食咗一次未咁快見效！」

文：影視組