紅地氈一向都是女星爭艷之地，早前在英國舉行的《007：鬼影帝國》 舉行盛大的首映禮，英國劍橋公爵夫人凱瑟琳穿上淺藍色的連身裙，星級造型師郭慶彬就大讚凱瑟琳着出飄逸感，簡約的設計已經十分吸引，不用爭艷就已成為全場焦點。「晚裝裙好好睇，比例好均勻，佢嗰種飄逸同輕盈感，已經贏咗，成條裙望落去好簡單，真係着出簡約出塵嘅感覺，唔需要戴誇張飾物，已經好吸引。」
「紅地氈唔好着橙色晚裝裙，好似着咗地氈上身，條裙唔係唔靚，我覺得着錯場合，好似同地氈融為一體，佢勝在黑皮膚，如果條裙白色會更靚。」
「好靚，紅地氈襯金裙好搶眼，條珠片裙簡單又高貴，唯一覺得髮型唔襯，條裙好女人，唔使梳個咁曲嘅造型，整個簡潔髮型仲大體。」
「一貫紅地氈打扮，條裙好靚，好多立體花剪裁，比例唔錯，又唔算好特別，因為喺紅地氈出過好多條呢種打扮，已經有一千幾百個，有時太誇張未必係最靚。」
「絲絨好易畀人着得瘦同好似高貴，但佢高貴味欠奉，反而顯得佢骨架大，着得麻麻，如果佢着吊帶或者入膊晚裝裙會仲好睇。」
星級造型師郭慶彬（Ricky）的配搭功架深受女星讚賞，是型媽吳君如、「大美人」李嘉欣與「玉女掌門人」周慧敏等的御用造型師，在業界備受肯定。Ricky亦是一眾品牌之友，經常被各大品牌邀請出席米蘭與巴黎時裝周，還會為品牌在尊貴活動上充當講師，與VIP分享與傳授配搭之道。