初哥哥靚聲冧君好 喚醒集體回憶

Chilam又追問阿佘的感情狀況，阿佘即叫對方做紅娘介紹好男人。

張：張智霖　佘：佘詩曼

張：我哋演番同一個角色，真人同角色一齊成熟，我好似未見過有戲係咁，由電視劇搬去電影拍續集，又相隔15年再演，可唔可以申請健力士世界紀錄？

佘：君好咁多年都好大分別，當年係好無憂無慮，被寵壞。

張：上次係愛情為主，少女情懷，今次多咗家庭探討，沉重咗(口架)！唔係故意催淚，如果睇過劇嘅觀眾，咁多年情意結，見番呢班人，有唔同遭遇，相信大家都有感觸。

難忘衝樓梯

佘：電視最近又重播呢！大家會搵番呢個感覺同回憶，我哋個樣都有啲唔同啦！

張：如果同十五年前一樣樣咪好怪？其實我好大分別(口架)！靚仔咗啦！

佘：哈哈！我當然認同啦！今次初哥哥最大進步係講番嘢，開頭有少少唔慣，以前睇慣你手語，依家聽番你把聲又OK好聽喎！

張：好彩你咁講啫！15年前你係頭幾套劇，係摸索階段，到依家你累積咗咁多經驗，好唔同。

佘：多謝你15年前嘅教導！記得當年最難忘係你帶我喺澳門衝大三巴！

張：其實好危險，但又真係唔識驚喎！我哋坐住綿羊仔，一齊喺大三巴樓梯由頂衝落去！

佘：係好危險，唔知點解我又信你喎！

張：我自己都唔信自己，點解你會信我？其實我唔識揸！至於今次電影票房就冇諗喇！我哋做好自己部分，其他就交畀觀眾，我都冇諗上次點解成功，當時仲嬲過，臨上之前做咩改《十月初五的月光》呢個劇名？

佘：係囉！咁長，邊個記得呀？

張：本來叫《澳門街》，後尾套劇受歡迎，梗係話個名改得好啦！個名係有意思嘅，好浪漫！

張：講番個角色，初哥哥係性格好好嘅人，好奉獻好犧牲，一生只愛一個人，難能可貴，我都希望識到咁嘅朋友。如果問我同初哥哥似唔似，必定有共通，咁我都係個善良嘅人。

佘：唔出聲嗰時？哈哈！講笑咋！

張：我有好多嘢要向初哥哥學習，例如對家人嘅奉獻啦！呢啲係日積月累，唔係做一單就夠，平日為家庭成員，每事都做好啲。

佘：你講起家庭成員，我諗起你隻狗呀！哈哈！

張：唉！我諗住拎去人道毀滅，佢成日通屋屙尿，平時係聽話，但有時佢有情緒……哎呀！講起佢，搞到我唔善良喇！

唔諗結婚夢

佘：至於君好原本好任性，個天畀咗件好大嘅事發生，之後佢知點做人處世，以前只係玩同拍拖，今次牽涉到屋企、仔女，我真人就未有仔女，但每個人都係要不斷成長。

張：君好不停尋覓真愛，阿佘都係咁。

佘：但我都唔知幾時搵到，搵到話你知！以前會Set年紀，依家都過晒啦！仲諗咩！

張：要繼續諗，做人要有夢想！

佘：80歲前？冇話一定要結婚，順其自然啦！

張：其實你依家有冇男友？

佘：冇呀！有冇好介紹？

張：我好鍾意做紅娘，見到身邊朋友開心拍拖，幾正！我會幫你搵個啱，雖然之前未成功過，但你可以係第一個成功嘛！

佘：吓？你未成功過？

張：哈哈！對唔住呀！我會好好諗(口架)喇！