秋生盼拍電影版拒裸泳謝票

無綫台慶劇《梟雄》前晚於九龍灣舉行首映，一眾主角包括黃秋生、湯鎮業、黎耀祥、蘇玉華、陳煒、梁琤等齊齊亮相紅地氈。

為讓傳媒先睹為快，大會特別率先播出首集劇情，以秋生、湯鎮業、黎耀祥三兄弟的恩怨情仇揭開序幕，拍攝手法充滿電影感，加上該劇在內地影城的舊上海場景取景，甚為逼真，飾演上海大亨的黃秋生更以上海腔調演繹；鮮有演大反派的黎耀祥，其「癲狗」角色亦頗火爆，至劇集末段，秋生與黎耀祥更大打出手，火藥味十足。

沈卓盈（左起）、陳煒、蘇玉華和梁琤盛裝出席首映禮。	陳煒笑言在劇中被馬國明睇全相。	唐詩詠一身露臍裝亮相。

反擊王晶批評

眾演員於首映後分享拍攝點滴，秋生即賣口乖謂：「我係好坦率嘅人，如果唔得，我五分鐘就走咗，好精彩，我仲要補充一句，多謝TVB。」湯鎮業則指劇集質素高，黎耀祥就笑謂：「秋生哥話好睇，就梗係好睇啦！」秋生受訪時直言對該劇收視有信心，問到寄望收視如何？他說：「唔知幾點叫好，愈高愈好，阿湯話收視好請食大閘蟹。（收視好有咩慶祝？）唔知喎，拍電影啦，收視好都會拍電影版？（依家興裸泳謝票！）你哋慢慢玩啦，唔好搞阿叔。」

湯鎮業讚劇集質素高。

秋生和黎耀祥在劇中大打出手。

對於王晶近日於微博暗指他批評陳凱琳，問他可希望新作收視比王晶監製的《風雲天地》高？秋生淡然謂：「我冇睇，你講嗰個係邊個我都唔知，咩意見都冇所謂，佢係咪同TVB有仇，人哋套劇上，你講啲咁嘅嘢，唔知係咪TVB得罪咗佢，我有乜所謂，我呢啲死豬不怕熱燙。（話你演戲猙獰過被批評嘅新人！）做喜劇唔好笑，做恐怖片又唔好笑，好似佢咁就好咩，唔好講佢喇，多餘人嚟。」

陳煒咀馬國明

黎耀祥則表示該劇還未出街已有不少人談論，寄望收視能過30點，是否準備再奪視帝？他謙稱：「唔係，秋生同阿湯都演得好好，秋生啲戲真係典範，所有演員都應該向佢學習，幾有驚喜。」至於30年後再拍無綫劇的湯鎮業，希望能獲觀眾接受。至於性感現身的陳煒，笑指事前未有給老公過目，更透露劇中與馬國明有咀戲：「佢仲睇過我全相添！」文：影視組