古天樂自細操肌 書包當啞鈴

古天樂自爆年少時會用書包當啞鈴操肌。

古天樂昨日到旺角為某健身中心任開幕嘉賓，並穿上型仔西裝與世界各地拳手合照，模特兒郭思琳、搶包山皇后「蜘蛛女」鄭麗莎、(0靚)模黃榕、武打女星陳鈺芸（JuJu）等亦有出席。大會向古仔送上VIP會員卡，讓他任何時候都可以到該集團旗下健身中心健身。

邊運動邊睇戲

古仔雖然工作忙碌，但仍堅持每周做三天運動，他說：「做運動最緊要唔好懶，要有恆心，做運動係好孤獨，我會一路做一路開套戲嚟睇。（搵個伴做運動？）要搵都搵個教練先！（好少出外面做gym？）我鍾意喺屋企做運動，跑吓步、掌上壓都得(0架)，但我斷過十字韌帶，唔可以跑太劇烈。（好留意體重？）我會check住脂肪含量，屋企有部機check，長期都係脂肪含量低，磅數反而冇在意。」

古天樂（後排左四）與來自世界各地的拳手合照。

黃榕悉心打扮性感亮相。

唔掂煎炸食物

問古仔會否考慮爆肌示人？他說：「嗰啲要谷，我唔使咁，但如果拍戲要到，就會。我細個冇錢買啞鈴，試過搵啲書包嚟舉，視乎裝幾多本書就有幾重。（啲女同學睇到嘩嘩聲？）我喺屋企做，如果有人喺操場舉書包，佢一定係黐咗線！（投資開番間健身室？）自己開一間就冇諗過，但運動係對身體有益，另外都要注意飲食，我基本上唔食煎炸嘢，由細到大都係咁！」文：影視組