陳凱琳處女出戰 星洲奪兩獎

被視為台慶頒獎禮熱身賽的《星和無綫電視大獎2015》昨晚圓滿結束，無綫一眾花旦小生盛裝登場，炒熱全場氣氛。頒獎禮最終由陳展鵬憑主演劇集《張保仔》蟬聯視帝寶座：「有啲緊張兼興奮，多謝大會同公司。上年攞時確實好開心，覺得可以畀少少成績媽咪睇，但因為上年光咗頭，拍出嚟嘅照片唔好睇，不過又因為光咗頭拍《張保仔》先再有獎攞。最近好多關於我同洪永城及陳凱琳嘅負面新聞同緋聞，但都影響唔到我哋大家嘅感情。」當問到展鵬會否因得獎而增強接下來頒獎禮的得獎信心，他笑謂：「年年都有信心，不過今年《梟雄》好強橫，湯鎮業係我兒時偶像，黎耀祥好戲唔使講，黃秋生就演乜似乜。」

林夏薇含淚封女配

而汪明荃（阿姐）則憑劇集《華麗轉身》躋身「星和視后」之列，她謂：「多謝區生（無綫高層區偉林），多謝公司同大會，冇佢哋栽培，我哋又點會企喺台上？恭喜TVB栽培出演藝界新一代嘅勢力，大家只要尊重自己行業就可以好似我咁，等到一個好角色有所發揮。」而王浩信憑《再戰明天》，以及林夏薇憑《衝線》分別獲得「我最愛TVB男、女配角」，可喜可賀。王浩信表示﹕「今年係我入行10周年，呢個獎好有意義。」林夏薇得獎後難掩激動，含淚謂：「呢個係我喺戲劇上第一個獎項，多謝新加坡朋友，多謝老公，佢一路以嚟都支持我工作。」

陳展鵬憑《張保仔》蟬聯視帝，坦言既緊張又興奮。

汪明荃憑劇集《華麗轉身》奪「星和視后」。

至於首次出戰頒獎禮的Grace獲頒發「最佳新人」，難掩興奮之情：「我第一次去頒獎禮，就獲呢個獎係好大嘅祝福。多謝兩位男主角陳展鵬及洪永城，拍劇時佢哋畀咗好多鼓勵及支持我。」其後Grace更擊敗鍾嘉欣及楊怡等對手，獲頒「性感魅力大獎」。她笑言要多謝坐在身邊的洪永城一早睇穿她的魅力潛質。當司儀李浩林問是否還有影帝級人馬「獨具慧眼」，Grace不肯明言男友鄭嘉穎，竟「推波」向坐在台下的黎耀祥解窘。

馬國明普通話太爛

而花旦胡定欣、鍾嘉欣及岑麗香、小生黎耀祥、陳豪等13位藝人，先後獲大會頒發「我最喜愛TVB電視男、女角色」獎。率先上台領獎的馬國明，被司儀鄭裕玲取笑普通話講得不好：「現在增設了很多普通話節目要配音，多謝馬國明。你說幾句普通話來聽聽好不好？」

而正身在澳門趕拍《巨輪II》的田蕊妮，未能親身出席改由拍檔胡定欣代領，定欣搞笑幫阿田致謝詞：「多謝大會、劇集《鬼同你OT》台前幕後，更加要多謝姜蓉（定欣角色），因為冇姜蓉就冇孫淑梅（阿田角色）。」勇奪飛躍進步藝人獎的朱千雪，在台上謂：「好感激公司一路畀機會我，遇到好多錫我嘅監製同拍檔，呢個獎對我係鼓勵，我會繼續畀心機。」

文：影視組