話事人停廠
Ｃ：三個之中，緊係搵大隻仔做Team leader啦。可以鬧佢，將啲責任歸咎於佢，真係好好！其實大隻仔有好多堅持，好似人哋講完句對白，佢就要唔知停幾多秒先接呢啲。佢同我哋傾咗好耐，仲走去同導演講，呢份勇氣真係犀利。
東：係我喺無綫咁耐，第二個人敢停晒成個廠，連啲主角都企晒喺度，仲要嗰句唔係影響好大，係碎料嚟！
溫：只不過我覺得咁樣真係會好啲，哈哈。係我解釋得唔好，佢哋唔明我咩意思，我有要求嘛，大家唔好信佢哋。
獨欠一個「瘦」
Ｃ：如果加多個成員梗係搵蔡思貝啦，佢真係我見過最瘦嘅藝人！而且態度好，拍劇用心鑽研個故事。
溫：之前同佢拍過《衝線》，開頭拍之前係肥啲，佢每次拍劇都會瘦。
出道辛酸史
Ｃ：我啲辛酸史講到口都臭，都係戶口得番幾十蚊咁！
溫：我試過好多次戶口得番幾十蚊，用銀仔買飯。因為我唔係簽每個月有salary嗰種約，係做幾多有幾多收入，多勞多得，但亦唔想問屋企攞。
東：我冇試過戶口得番幾十蚊，我啲理財都ok，亦買到樓上車。因為借錢讀書一畢業就孭住十皮債，但又唔想畀息就頭一年還晒佢，所以嗰時死慳死抵，冇錢食飯就買一大舊提子麥包，真係唔知點解我食麵包都搞成咁（身形）！