宅男遇騙子
Ｃ（C君）：我好肯定大隻仔冇好似劇中咁被人呃感情，佢有冇呃過人我就唔知。我自己就冇試過覺得被人呃，唔啱咪唔一齊囉，冇話呃唔呃。我覺得有被人呃嘅條件都唔錯，例如呃錢，所以我冇呢個福分！
東（何遠東）：呢方面我覺得自己都幾失敗，唔係好識處理感情問題。之前太hurt，依家就好似喺谷底爬緊上嚟，已經復原咗兩年，但都ok嘅，身邊有朋友畀正能量我。
醉扮張家輝
Ｃ：現實中好耐之前試過飲醉。嗰次生日同陸永一齊慶祝，仲有幾十人喺度。喺銅鑼灣搞，係人生唯一一次搞，真係唔會再搞囉，搞着自己！嗰時未入行，細個又唔識，乜都拎嚟飲。嗰時我同陸永好鍾意張家輝同吳鎮宇，有套戲係佢兩個拍，我哋醉咗之後，喺條街一路行返屋企，一個扮張家輝一個扮吳鎮宇，喺條街好大聲咁對話。呢件事我同佢兩個都已經唔記得，係啲朋友話番畀我哋知，我就問佢做乜唔拍片！