肥C大隻 笑聲鬥玩
「高矮肥」三人組溫家偉（大隻仔）、鄭詩君（C君）及何遠東（肥仔東），早前因合拍劇集《鬼同你OT》而成為好友。首次合作的三人一拍即合，締造多個爆笑場面。大隻仔更成為C君及肥仔東的發洩對象，任打唔嬲。外形極不協調的三人在訪問中互相揭秘，友情盡現之餘亦不忘大放笑彈。
初見「高矮肥」
Ｃ：Ｃ君 溫：大隻仔 東：肥仔東
東：未識嗰時，淨係知大隻仔桃花旺囉。
Ｃ：見到之後好放心！呢套係我第二部劇，主要同佢兩個做對手戲，應該幾好玩，唔使擔心有咩唔講得，三個人咩都傾。一有啲咩唔開心就會搵大隻仔打吓，佢係宣洩對象，因為佢喺拍緊嗰時成日欺負我哋，明明句對白到佢接，佢又NG。
溫：反而開頭知同你哋拍我有擔心，因為你哋兩個好識講嘢。而NG就因為我留意緊所有人做緊咩，冇留意自己原來冇講對白！
OT最深刻
Ｃ：我睇番我哋三個啲戲，真係覺得剪接同導演好勁。完全唔覺得大隻仔有問題，佢突然間又做得幾好喎，即係話其實佢好明白個鏡頭做緊乜。
東：其實我哋本身唔識大家，突然就入廠開工，又冇乜點夾過，一roll機我哋好快就搵到個方向。不過有啲場口我哋三個人一齊出鏡，如果有得睇到前一場嘅人點做，一定會幫到成件事再做好啲，可能自己依家仲未夠功力。
溫：有場戲我哋要將啲嘢食周圍掟。C君掟啲三文治過嚟掟得好大力，跟住掟啲薯片好似我沖緊涼，喺上面倒落嚟咁，真係好好笑！又有場戲，係劇臨尾我哋三個喺阿Mo（陳豪） office話搞吓氣氛，一齊喺入面打交，我又畀人打！
Ｃ：又係你畀人打？我對呢啲冇乜印象喎。我最深刻係有次真係好辛苦，我喺度扮焗桑拿，成頭汗，但啲汗其實係水嚟，個廠好凍我又成頭都係水，一拍完我即刻發咗兩日燒。
東：佢好專業，第二日仲有返工。我有場戲好鍾意，係我哋飲醉酒問阿Mo究竟佢鍾唔鍾意胡定欣，我覺得拍出嚟真係好好笑，由於佢哋個醉妝係我化，哈哈，好自豪。其實嗰日係因為我手多，衝咗入去化妝間話我識化，就是旦咁化兩嘢，拍出嚟又幾自然喎。同埋呢場戲，係唯一一場見到我同家姐（定欣）之間有深厚嘅感情，大家都發揮得幾好。C君佢成日都加自己嘅元素喺劇入面，我覺得好好，令成件事pop up咗！